രാഹുൽ മാങ്കൂട്ടത്തിൽ എം.എൽ.എയ്ക്ക് അനുകൂലമായി കോൺഗ്രസ് മുഖപത്രമായ ‘വീക്ഷണം’ പ്രസിദ്ധീകരിച്ച ലേഖനത്തിൽ ജാഗ്രതക്കുറവുണ്ടായി എന്ന് വീക്ഷണം മാനേജിംഗ് ഡയറക്ടർ ജെയ്‌സൺ ജോസഫ്. വിഷയത്തിൽ എഡിറ്റോറിയൽ ബോർഡിനോട് വിശദീകരണം തേടിയതായും അദ്ദേഹം അറിയിച്ചു. പാർട്ടിയുടെ നയത്തിനോട് യോജിക്കുന്നതല്ല ലേഖനമെന്ന് കെ.പി.സി.സി പ്രസിഡന്റ് സണ്ണി ജോസഫും പ്രതികരിച്ചു. മുഖപ്രസംഗം തിരുത്താൻ ആവശ്യപ്പെട്ടതായും അദ്ദേഹം വ്യക്തമാക്കി. പ്രതിപക്ഷ നേതാവ് വി.ഡി. സതീശൻ അടക്കം പാർട്ടി നേതൃത്വം ലേഖനത്തെ നേരത്തെ തള്ളിപ്പറഞ്ഞിരുന്നു.
മുഖപ്രസംഗത്തിലെ വിവാദ പരാമർശങ്ങൾ
‘പാപം ചെയ്യാത്തവർ കല്ലെറിയട്ടേ’ എന്ന തലക്കെട്ടോടെ പ്രസിദ്ധീകരിച്ച എഡിറ്റോറിയൽ, രാഹുലിനെതിരെ വന്നത് വ്യാജ ലൈംഗിക ആരോപണമാണെന്ന് വാദിക്കുന്നു. ലൈംഗിക പീഡനക്കേസിൽ രാഹുലിനെ വിമർശിക്കാൻ സി.പി.ഐ.എമ്മിന് അവകാശമില്ലെന്ന് ലേഖനം പറയുന്നു.
തിരഞ്ഞെടുപ്പ് അടുക്കുമ്പോൾ സി.പി.ഐ.എമ്മിൽ നിന്ന് അതിസാരവും ഛർദിയുമാണ് ഉണ്ടാകുന്നതെന്ന കടുത്ത പരാമർശങ്ങളും മുഖപ്രസംഗത്തിൽ ഉണ്ടായിരുന്നു. തിരഞ്ഞെടുപ്പിൽ ജയിക്കാൻ വേണ്ടിയുള്ള ഇത്തരം പ്രയോഗങ്ങൾ മുൻപും ഉണ്ടായിട്ടുണ്ട്.
1996-ലെ സൂര്യനെല്ലി കേസും 2006-ലെയും 2011-ലെയും ഐസ്ക്രീം പാർലർ കേസും വീക്ഷണം ഈ സന്ദർഭത്തിൽ ഓർമ്മിപ്പിക്കുന്നു. ജനപ്രിയ നേതാവിനെതിരെയുള്ള രാഷ്ട്രീയ ആരോപണം മാത്രമാണിതെന്നും എഡിറ്റോറിയൽ വാദിച്ചു. പാലക്കാട് ഉപതിരഞ്ഞെടുപ്പിൽ എൽ.ഡി.എഫിനെയും ബി.ജെ.പി.യെയും ചരിത്ര ഭൂരിപക്ഷത്തിൽ തോൽപ്പിച്ചതായിരുന്നു രാഹുൽ ചെയ്ത കുറ്റമെന്നും ലേഖനം പറയുന്നു.
