എസ്‌ഐആർ പിൻവലിക്കണം; മുഖ്യ തിരഞ്ഞെടുപ്പ് കമ്മീഷണറെ പുറത്താക്കണമെന്ന് ആവശ്യപ്പെട്ട് രാജ്യവ്യാപകമായി കർഷക പ്രതിഷേധം

വോട്ടർപട്ടികയിലെ പ്രത്യേക തീവ്രപരിശോധനയായ എസ്‌ഐആർ (Special Intensive Revision) പിൻവലിക്കണമെന്നും മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ സ്ഥാനത്തുനിന്ന് നീക്കി നിയമനടപടി സ്വീകരിക്കണമെന്നും ആവശ്യപ്പെട്ട് രാജ്യവ്യാപകമായി കർഷക പ്രതിഷേധം. സംയുക്ത കിസാൻ മോർച്ചയുടെ (എസ്‌കെഎം) നേതൃത്വത്തിൽ വെള്ളിയാഴ്ച വിവിധ ജില്ലകളിലും താലൂക്ക് ആസ്ഥാനങ്ങളിലും പ്രതിഷേധം സംഘടിപ്പിച്ചു. ജില്ലാ മജിസ്‌ട്രേറ്റുമാർ, സബ് ഡിവിഷണൽ മജിസ്‌ട്രേറ്റുമാർ എന്നിവർ മുഖേന രാഷ്ട്രപതിക്ക് നിവേദനങ്ങളും സമർപ്പിച്ചു.

പൊലീസ് ഇടപെടലുകളും നിയന്ത്രണങ്ങളും ഉണ്ടായിട്ടും നിരവധി സ്ഥലങ്ങളിൽ പ്രതിഷേധം നടന്നതായി എസ്‌കെഎം പ്രസ്താവനയിൽ അറിയിച്ചു. സംഘടനയുടെ നേതാക്കളിൽ പലരെയും പുലർച്ചെ മുതൽ വീട്ടുതടങ്കലിലാക്കിയെന്നും പ്രതിഷേധ കേന്ദ്രങ്ങളിലേക്ക് പോകുകയായിരുന്നവരെ കസ്റ്റഡിയിലെടുത്തെന്നും ചില മേഖലകളിൽ നിരോധനാജ്ഞ ഏർപ്പെടുത്തിയെന്നും സംഘടന ആരോപിച്ചു.

ബിജെപി ഭരിക്കുന്ന ഉത്തർപ്രദേശ്, മധ്യപ്രദേശ്, ഹരിയാന എന്നീ സംസ്ഥാനങ്ങളിൽ കടുത്ത നിയന്ത്രണങ്ങൾ ഏർപ്പെടുത്തിയതായും എസ്‌കെഎം പറഞ്ഞു. പശ്ചിമബംഗാൾ, ബിഹാർ, തമിഴ്‌നാട്, ആന്ധ്രാപ്രദേശ്, കർണാടക, ഒഡീഷ തുടങ്ങിയ സംസ്ഥാനങ്ങളിലും സംഘടനയും അനുബന്ധ സംഘടനകളും പ്രതിഷേധങ്ങളും ഐക്യദാർഢ്യ പരിപാടികളും സംഘടിപ്പിച്ചു.

‘13 കോടിയിലധികം പേരുകൾ വോട്ടർപട്ടികയിൽനിന്ന് നീക്കി’

വോട്ടർപട്ടികയിൽനിന്ന് 13 കോടിയിലധികം പേരുകൾ നീക്കം ചെയ്തതായാണ് എസ്‌കെഎം ആരോപിക്കുന്നത്. കർഷകരുടെ ഏറ്റവും ശക്തമായ ആയുധം വോട്ടാണെന്നും അത് കവർന്നെടുക്കാൻ അനുവദിക്കില്ലെന്നും സംഘടന വ്യക്തമാക്കി. എസ്‌ഐആർ നടപടിയിലൂടെ അർഹരായ പൗരന്മാർക്ക് വോട്ടവകാശം നഷ്ടപ്പെടുന്ന സാഹചര്യം ഒഴിവാക്കണമെന്നും ആവശ്യപ്പെട്ടു.

എസ്‌ഐആർ നടപടികൾ പൂർണമായി പിൻവലിക്കുക, തെറ്റായി നീക്കം ചെയ്ത അർഹരായ വോട്ടർമാരുടെ പേരുകൾ പുനഃസ്ഥാപിക്കുക, വോട്ടർപട്ടികയിൽനിന്നുള്ള ഓരോ പേരുനീക്കലും സുതാര്യമായ പൊതുപരിശോധനയ്ക്ക് വിധേയമാക്കുക എന്നിവയാണ് പ്രധാന ആവശ്യങ്ങൾ. വോട്ടവകാശം സംരക്ഷിക്കുന്നതിനായി പേരുകൾ നീക്കം ചെയ്യുന്നതിലെ നടപടിക്രമങ്ങൾ സുതാര്യമാക്കണമെന്നും സംഘടന ആവശ്യപ്പെട്ടു.

തിരഞ്ഞെടുപ്പ് കമ്മീഷണർമാരുടെ നിയമനരീതിയിലും മാറ്റം വേണം

മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ സ്ഥാനത്തുനിന്ന് നീക്കുകയും അദ്ദേഹത്തിനെതിരെ നിയമനടപടി സ്വീകരിക്കുകയും വേണമെന്ന് എസ്‌കെഎം ആവശ്യപ്പെട്ടു. തിരഞ്ഞെടുപ്പ് കമ്മീഷണർമാരുടെ നിയമനം നിയന്ത്രിക്കുന്ന 2023ലെ നിയമത്തിൽ ഭേദഗതി വരുത്തണമെന്നും സംഘടന ആവശ്യപ്പെട്ടു.

നിയമനത്തിനുള്ള സമിതിയിൽ പ്രധാനമന്ത്രി നിർദേശിക്കുന്ന മന്ത്രിക്ക് പകരം ഇന്ത്യയുടെ ചീഫ് ജസ്റ്റിസിനെ ഉൾപ്പെടുത്തണമെന്നാണ് ആവശ്യം. തിരഞ്ഞെടുപ്പുകളിൽ സർക്കാർ ധനസഹായം ഉറപ്പാക്കുക, പണത്തിന്റെയും പേശീബലത്തിന്റെയും സ്വാധീനം നിയന്ത്രിക്കുക തുടങ്ങിയ വിപുലമായ തിരഞ്ഞെടുപ്പ് പരിഷ്‌കാരങ്ങളും സംഘടന മുന്നോട്ടുവച്ചു.

2026 ഒക്ടോബർ 11-ന് ഡൽഹി പൊലീസ് പുറപ്പെടുവിച്ച ഉത്തരവിലൂടെ പ്രതിഷേധ വേദികളുടെ പട്ടികയിൽനിന്ന് ജന്തർ മന്തറിനെ ഒഴിവാക്കിയ നടപടിയും പിൻവലിക്കണമെന്ന് എസ്‌കെഎം ആവശ്യപ്പെട്ടു.

വിദ്യാർഥികൾക്കെതിരായ പൊലീസ് നടപടിയിൽ പ്രതിഷേധം

എസ്‌ഐആറിനെതിരെ ന്യൂഡൽഹിയിൽ പ്രതിഷേധിച്ച വിദ്യാർഥികൾക്കും യുവാക്കൾക്കുമെതിരെ പൊലീസ് സ്വീകരിച്ച നടപടികളെയും എസ്‌കെഎം അപലപിച്ചു. വനിതാ വിദ്യാർഥികൾക്കും മാധ്യമപ്രവർത്തകർക്കും നേരെ ലൈംഗികാതിക്രമം നടന്നെന്ന റിപ്പോർട്ടുകളിൽ അന്വേഷണം നടത്തി ഉത്തരവാദികൾക്കെതിരെ കർശന നടപടി സ്വീകരിക്കണമെന്നും സംഘടന ആവശ്യപ്പെട്ടു.

ജനാധിപത്യപരമായ അവകാശങ്ങൾ സംരക്ഷിക്കാനുള്ള വിദ്യാർഥികളുടെയും യുവാക്കളുടെയും പോരാട്ടത്തിന് കർഷകർ പിന്തുണ നൽകുമെന്നും എസ്‌കെഎം പ്രഖ്യാപിച്ചു. സമാധാനപരമായി പ്രതിഷേധിക്കാനുള്ള ഭരണഘടനാപരമായ അവകാശത്തിനുമേലുള്ള കടന്നുകയറ്റമാണ് നിയന്ത്രണങ്ങളെന്നും നേതാക്കളെ വീട്ടുതടങ്കലിലാക്കാൻ കരുതൽ തടങ്കൽ വ്യവസ്ഥകൾ ഉപയോഗിക്കുന്നതിനെ അംഗീകരിക്കാനാവില്ലെന്നും സംഘടന വ്യക്തമാക്കി.

നിയന്ത്രണങ്ങൾക്കിടയിലും പ്രതിഷേധങ്ങളിൽ പങ്കെടുത്ത കർഷകർ, കർഷകത്തൊഴിലാളികൾ, മറ്റ് ജനാധിപത്യ വിഭാഗങ്ങൾ എന്നിവർക്കും എസ്‌കെഎം നന്ദി അറിയിച്ചു. ആവശ്യങ്ങൾ അംഗീകരിക്കുന്നതുവരെ സമരം തുടരുമെന്നും സംഘടന വ്യക്തമാക്കി.