ഗവർണറുടെ ഇൻസ്റ്റഗ്രാം ഐഡിയിൽ ബിജെപി പേര്; രാഷ്ട്രപതിക്ക് പരാതിയുമായി എസ്.എഫ്.ഐ

കേരള ഗവർണർ ഓം പ്രകാശ് മാഥൂറിന്റെ ഔദ്യോഗിക ഇൻസ്റ്റഗ്രാം അക്കൗണ്ടിൽ ബിജെപിയുടെ പേര് ഉൾപ്പെടുത്തിയതിനെതിരെ രാഷ്ട്രപതി ദ്രൗപദി മുർമുവിന് പരാതി നൽകി എസ്.എഫ്.ഐ. ഭരണഘടനാ പദവിയിലിരിക്കുന്ന ഒരാളിൽനിന്ന് പ്രതീക്ഷിക്കുന്ന രാഷ്ട്രീയ നിഷ്പക്ഷതയുടെ ലംഘനമാണിതെന്ന് പരാതിയിൽ ചൂണ്ടിക്കാട്ടി. എസ്.എഫ്.ഐ തിരുവനന്തപുരം ജില്ലാ സെക്രട്ടറി എം.എ. നന്ദനാണ് രാഷ്ട്രപതിക്ക് കത്തയച്ചത്.

ഗവർണറുടെ ഇൻസ്റ്റഗ്രാം അക്കൗണ്ടിന്റെ പേര് ‘ommathurbjp’ എന്നാണെന്ന് പരാതിയിൽ പറയുന്നു. ഒരു ഗവർണർ തന്റെ ഔദ്യോഗിക സാമൂഹികമാധ്യമ അക്കൗണ്ടിൽ രാഷ്ട്രീയ പാർട്ടിയുടെ പേര് ഉപയോഗിക്കുന്നത് ഭരണഘടനാപരമായ നിഷ്പക്ഷതയ്ക്കും പദവിയുടെ അന്തസ്സിനും വിരുദ്ധമാണെന്നാണ് എസ്.എഫ്.ഐയുടെ വാദം. ഇത്തരമൊരു രാഷ്ട്രീയ ബന്ധം ഭരണഘടനാ സ്ഥാപനങ്ങളിലുള്ള പൊതുജനവിശ്വാസത്തെ ബാധിക്കുമെന്നും പരാതിയിൽ ചൂണ്ടിക്കാട്ടുന്നു.

ഭരണഘടനയുടെ സംരക്ഷകനായി പ്രവർത്തിക്കേണ്ട ഗവർണർ ഏതെങ്കിലും രാഷ്ട്രീയ പാർട്ടിയുടെ പ്രതിനിധിയായി പ്രവർത്തിക്കാൻ പാടില്ലെന്നും ഗവർണർ പദവിയുടെ അന്തസ്സും നിഷ്പക്ഷതയും ഉറപ്പാക്കാൻ രാഷ്ട്രപതി ഇടപെടണമെന്നുമാണ് എസ്.എഫ്.ഐയുടെ ആവശ്യം. ബിജെപിയിൽ വിവിധ പദവികൾ വഹിച്ചിരുന്ന മാഥൂറിന്റെ മുൻകാല രാഷ്ട്രീയ ബന്ധങ്ങളും പരാതിയിൽ പരാമർശിച്ചിട്ടുണ്ട്.

മുൻ ഗവർണർ രാജേന്ദ്ര വിശ്വനാഥ് ആർലേക്കർ തമിഴ്നാട് ഗവർണറായി മാറിയതിനെത്തുടർന്ന് ഒക്ടോബർ 23നാണ് ഓം പ്രകാശ് മാഥൂർ കേരളത്തിന്റെ 29-ാമത് ഗവർണറായി ചുമതലയേറ്റത്. രാജസ്ഥാൻ സ്വദേശിയായ മാഥൂർ ആർഎസ്എസ് പ്രചാരകനായാണ് പൊതുപ്രവർത്തന രംഗത്തെത്തിയത്. പിന്നീട് ഗുജറാത്തിന്റെ ചുമതലയുള്ള ബിജെപി ജനറൽ സെക്രട്ടറിയായും രാജസ്ഥാനിൽനിന്നുള്ള രാജ്യസഭാംഗമായും പ്രവർത്തിച്ചിട്ടുണ്ട്.