കിഫ്ബിയെ ദുർബലപ്പെടുത്തിയാൽ കേരളം 25 വർഷം പിന്നോട്ടുപോകും: തോമസ് ഐസക്

കേരള ഇൻഫ്രാസ്ട്രക്ചർ ഇൻവെസ്റ്റ്‌മെന്റ് ഫണ്ട് ബോർഡിനെ (കിഫ്ബി) ദുർബലപ്പെടുത്തി സാധാരണ ബജറ്റ് വിഹിതം മാത്രം ഉപയോഗിച്ച് വികസന പദ്ധതികൾ നടപ്പാക്കാൻ ശ്രമിക്കുന്നത് കേരളത്തെ കാൽനൂറ്റാണ്ട് പിന്നോട്ടടിക്കുമെന്ന് സിപിഎം നേതാവ് ടി.എം. തോമസ് ഐസക്. സിപിഎം കാസർകോട് ജില്ലാ കമ്മിറ്റി യോഗത്തോടനുബന്ധിച്ച് മാധ്യമങ്ങളോട് സംസാരിക്കുകയായിരുന്നു അദ്ദേഹം.

കിഫ്ബിക്ക് ബാധ്യതകളുണ്ടെങ്കിലും അതിന് തുല്യമായ വലിയ പൊതുആസ്തികൾ സൃഷ്ടിക്കാൻ കഴിഞ്ഞിട്ടുണ്ടെന്ന് തോമസ് ഐസക് പറഞ്ഞു. ഭാവി വികസനം ലക്ഷ്യമിട്ട് ഏറ്റെടുത്ത ബാധ്യതകളെക്കുറിച്ച് മാത്രം സംസാരിക്കുകയും അതിലൂടെ സൃഷ്ടിക്കപ്പെട്ട ആസ്തികളെ അവഗണിക്കുകയും ചെയ്യുന്നത് ജനങ്ങളെ തെറ്റിദ്ധരിപ്പിക്കുന്നതിന് തുല്യമാണ്. സാധാരണ ബജറ്റ് വിഹിതം ഉപയോഗിച്ച് മാത്രം ഇത്തരം അടിസ്ഥാന സൗകര്യ വികസനങ്ങൾ നടപ്പാക്കാൻ ശ്രമിച്ചാൽ കുറഞ്ഞത് 30 വർഷമെങ്കിലും വേണ്ടിവരുമെന്നും അദ്ദേഹം ചൂണ്ടിക്കാട്ടി.

കിഫ്ബിയെ പൊതുമരാമത്ത് വകുപ്പിന് കീഴിലാക്കാനുള്ള നീക്കം അഴിമതിക്ക് വഴിയൊരുക്കാനാണെന്ന് സിപിഎം പോളിറ്റ് ബ്യൂറോ അംഗം എ. വിജയരാഘവൻ വിമർശിച്ചു. സിപിഎം കാസർകോട് ജില്ലാ കമ്മിറ്റി യോഗം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.

മദ്യം, പെട്രോൾ, വാഹന നികുതി എന്നിവയിൽ നിന്നുള്ള വരുമാനം അടിസ്ഥാന സൗകര്യ വികസനത്തിനായി വിനിയോഗിക്കുന്നതിലൂടെ സംസ്ഥാനത്തിന് അധിക വിഭവങ്ങൾ സമാഹരിക്കാൻ കിഫ്ബി സഹായിച്ചിട്ടുണ്ടെന്നും വിജയരാഘവൻ പറഞ്ഞു.

അതേസമയം, മുന്നണി നേതാക്കൾക്കും കുടുംബാംഗങ്ങൾക്കുമെതിരെ എൻഫോഴ്‌സ്‌മെന്റ് ഡയറക്ടറേറ്റ് (ഇഡി) സ്വീകരിക്കുന്ന നടപടികൾ രാഷ്ട്രീയ വേട്ടയാടലാണെന്ന് യോഗത്തിൽ വിമർശനമുയർന്നു. ശിക്ഷിക്കുകയല്ല, ഉപദ്രവിക്കുകയാണ് ഇഡിയുടെ ലക്ഷ്യമെന്ന് ആരോപിച്ച തോമസ് ഐസക്, ‘ഇഡി’ എന്നത് ‘ഇലക്ഷൻ ഡ്യൂട്ടി’ മാത്രമാണെന്നും പരിഹസിച്ചു.