പ്രപഞ്ചമെന്നല്ല, പ്രപഞ്ചങ്ങളെന്നാണ് പറയേണ്ടത്!
സാബു ജോസ്
 |
|
കോസ്മോളജിയില്‍ ഗണിതശാസ്ത്രപരമായി ഏറ്റവും പൂര്‍ണതയുള്ള സിദ്ധാന്തം എം- തിയറിയാണ്. എന്നാല്‍ പരീക്ഷണശാലയില്‍വച്ച് ഉപകരണങ്ങളുടെ സഹായത്തോടെ തെളിയിക്കുവാനുള്ള സാങ്കേതിക വിദ്യ ഇന്ന് നിലവിലില്ല. ലാര്‍ജ് ഹാഡ്രോണ്‍ കൊളൈഡറിലും ഇത്തരത്തിലുള്ള പരീക്ഷണങ്ങള്‍ ഇന്ന് നടത്താന്‍ കഴിയില്ല. അതിനര്‍ഥം നാളെ അതിന് കഴിയില്ലെന്നല്ല. ഗണിതപരമായി തെളിയിക്കപ്പെട്ട പ്രപഞ്ചസിദ്ധാന്തങ്ങളാണ് പിന്നീട് ശാസ്ത്ര സത്യങ്ങളായി അംഗീകരിക്കപ്പെടുന്നത്. മള്‍ട്ടിവേര്‍ഡുകള്‍ ശാസ്ത്രകഥകളല്ല, നാളത്തെ ശാസ്ത്ര പാഠപുസ്തകങ്ങളില്‍ പഠിക്കാനുള്ളവയാണ്. |
പരിഭ്രമിക്കേണ്ട. ഇത് എം- തിയറിയെന്ന ഏറ്റവും നവീനവും ഗണിതപരമായി ഏറ്റവും നിലനില്‍പ്പുമുള്ള പ്രപഞ്ചമാതൃകയാണ്. സ്ഥൂലപ്രപഞ്ചത്തിന്റെ അവസാന വാക്കായ ആപേക്ഷികതയും സൂക്ഷ്മലോകത്തെ അനിശ്ചിതത്വത്തിന്റെ ഭാഷയായ ക്വാണ്ടം ഭൌതികത്തിനും ഒരു പോറല്‍പോലും ഉണ്ടാക്കാതെ ഒരു സമ്പൂര്‍ണ പ്രപഞ്ച ചിത്രം നിര്‍മിക്കുകയാണ് എം- തിയറിസ്റുകള്‍. ഈ സിദ്ധാന്തം അതിന്റെ പണിപ്പുരയിലാണ്. തീര്‍ച്ചയായും ഇതൊരു അത്ഭുത ശിശുവായിരിക്കുമെന്നു തന്നെയാണ് ശാസ്ത്രലോകം പ്രവചിക്കുന്നത്. സര്‍വ്വതിന്റെയും സമ്പൂര്‍ണ സിദ്ധാന്തമാകുന്നതിന് മല്‍സരിക്കുന്ന ക്വാണ്ടം ഗ്രാവിറ്റി പ്രമാണങ്ങളില്‍ ഏറ്റവും മുന്നില്‍ നില്‍ക്കുന്നത് ഇന്ന് എം- തിയറിയാണ്. അടിസ്ഥാന ബലങ്ങളെ (ശക്ത, ക്ഷീണ ന്യൂക്ളിയര്‍ ബലങ്ങള്‍, വൈദ്യുത കാന്തിക ബലം, ഗുരുത്വാകര്‍ഷണ ബലം) സൈദ്ധാന്തികമായും ഗണിതപരമായും ഏകോപിപ്പിക്കുന്നതിന് എം- തിയറിക്ക് കഴിയുന്നുണ്ട്. ഈ സിദ്ധാന്തത്തിന്റെ പേരിലുള്ള 'M' എന്താണെന്ന് ഇതിന്റെ സൃഷ്ടാക്കള്‍ പറയുന്നില്ലെങ്കിലും ''Membrane' ' അഥവാ സ്തരമെന്നു വായിക്കാനാണ് ശാസ്ത്രലോകം ഇഷ്ടപ്പെടുന്നത്. ദുരൂഹ പ്രതിഭാസങ്ങളായ ശ്യാമദ്രവ്യത്തിനും ശ്യാമ ഊര്‍ജത്തിനും കൃത്യമായ നിര്‍വചനം നല്‍കാന്‍ ഈ സിദ്ധാന്തത്തിന് കഴിയുന്നുണ്ട്.
പ്രപഞ്ച രഹസ്യങ്ങളുടെ സമ്പൂര്‍ണ സിദ്ധാന്തം അന്വേഷിക്കുന്നവര്‍ ഒടുവില്‍ എത്തിച്ചേരുന്നത് എം- തിയറിയിലായിരിക്കും. അതോടൊപ്പം ഒരേയൊരു പ്രപഞ്ചമെന്ന (Universe) യാഥാസ്ഥിതിക കാഴ്ചപ്പാടില്‍നിന്നും വ്യത്യസ്തമായി നിരവധി പ്രപഞ്ചങ്ങളുടെ (Multiverse) സാധ്യതയിലേക്കും ഈ സിദ്ധാന്തം വാതില്‍ തുറക്കുന്നു. പേപ്പറുകള്‍ ഒന്നിനുമുകളില്‍ മറ്റൊന്നായി അടുക്കിവച്ചിരിക്കുന്നതുപോലെ നിരവധി പ്രപഞ്ചങ്ങളെ സ്പേസിന്റെ 11 മാനങ്ങള്‍ വേര്‍തിരിക്കുന്നു. ഓരോ പ്രപഞ്ചത്തിനുമിടയില്‍ അനന്തമായ ശൂന്യതയൊന്നുമില്ല. പതിനൊന്നുമാനങ്ങള്‍ തീര്‍ത്ത നേരിയ വിടവുമാത്രം. എന്നാല്‍ ഊര്‍ജ നിലയിലുള്ള അന്തരം ഒരു പ്രപഞ്ചാന്തര സഞ്ചാരത്തിന് അനുവദിക്കില്ലെന്നുമാത്രം.
മള്‍ട്ടിവേര്‍സുകള്‍ വെറുമൊരു സയന്‍സ് ഫിക്ഷനുമപ്പുറം നിലനില്‍ക്കുന്നതാണോ എന്ന് പരിശോധിക്കേണ്ടതുണ്ട്. ഭൌതിക ശാസ്ത്രത്തിലെ നിയമങ്ങള്‍ കപടശൂന്യത (False Vacuum) എന്നൊരു സാധ്യത അംഗീകരിക്കുന്നുണ്ട്. രണ്ട് വാക്വം സ്റ്റേറ്റുകളില്‍ ഒന്ന് മറ്റേതിനേക്കാള്‍ ഊര്‍ജനില കൂടിയ വാക്വം സ്റ്റേറ്റ് ക്വാണ്ടം ആന്ദോളനങ്ങള്‍ക്ക് വിധേയമാവുകയും ഊര്‍ജനില കുറഞ്ഞ സ്റ്റേറ്റിലേക്ക് പ്രവേശിക്കുകയും (quantum tunneling) ചെയ്യും. മള്‍ട്ടിവേര്‍സുകളുടെ നിലനില്‍പ്പിന് നിരവധി കപടശൂന്യതകളുള്ള ഒരു പ്രാപഞ്ചിക തിരശ്ശീല (Cosmological Landscape) വേണം. പ്രാപഞ്ചിക സ്ഥിരാങ്കങ്ങള്‍ (Cosmological constants) വ്യത്യസ്തങ്ങളായ അത്തരം പ്രപഞ്ചങ്ങള്‍ എത്രവരെയാകാമെന്നതാണ് മറ്റൊരു കാര്യം. ഏറ്റവും പുതിയ കണക്കുകൂട്ടലില്‍ ഇത് 10 1000 ണ്‍ വരെയാകാമെന്നാണ് കണ്ടെത്തിയിരിക്കുന്നത്. (ഒന്നിനു ശേഷം 1000 പൂജ്യം വരുന്ന സംഖ്യ. അതു വളരെ വലുതാണ്. ദൃശ്യപ്രപഞ്ചത്തിലെ ആകെ ആറ്റങ്ങളുടെ എണ്ണം 10 80 മാത്രമാണെന്ന്് അറിയുമ്പോള്‍ തീര്‍ച്ചയായും). പ്രാപഞ്ചിക തിരശ്ശീലയെന്നു പറയുമ്പോള്‍ അതിഭൌതികത്തിന്റെ ഭാഷയായി തെറ്റിദ്ധരിക്കേണ്ടതില്ല. D-brane സൈദ്ധാന്തികമായി തെളിയിക്കപ്പെട്ടിട്ടുണ്ട്.
കോസ്മോളജിയില്‍ ഗണിതശാസ്ത്രപരമായി ഏറ്റവും പൂര്‍ണതയുള്ള സിദ്ധാന്തം എം- തിയറിയാണ്. എന്നാല്‍ പരീക്ഷണശാലയില്‍വച്ച് ഉപകരണങ്ങളുടെ സഹായത്തോടെ തെളിയിക്കുവാനുള്ള സാങ്കേതിക വിദ്യ ഇന്ന് നിലവിലില്ല. ലാര്‍ജ് ഹാഡ്രോണ്‍ കൊളൈഡറിലും ഇത്തരത്തിലുള്ള പരീക്ഷണങ്ങള്‍ ഇന്ന് നടത്താന്‍ കഴിയില്ല. അതിനര്‍ഥം നാളെ അതിന് കഴിയില്ലെന്നല്ല. ഗണിതപരമായി തെളിയിക്കപ്പെട്ട പ്രപഞ്ചസിദ്ധാന്തങ്ങളാണ് പിന്നീട് ശാസ്ത്ര സത്യങ്ങളായി അംഗീകരിക്കപ്പെടുന്നത്. മള്‍ട്ടിവേര്‍ഡുകള്‍ ശാസ്ത്രകഥകളല്ല, നാളത്തെ ശാസ്ത്ര പാഠപുസ്തകങ്ങളില്‍ പഠിക്കാനുള്ളവയാണ്.
For Further Reading
- Book of Universes - John D. Barrow
- Quantum Universe - Brian Cox
- The Hidden Reality - Brian Greene
- In Search of the Multiverse - John Gribbin
- Endless Universe - Roger Penrose
- Gravity's Engines - Caleb Schraf.
www.facebook.com/sabu.jose.735
SABU JOSE
Ph : 9656363145
E-mail:
This e-mail address is being protected from spambots. You need JavaScript enabled to view it