ദിയ മിർസയ്‌ക്കെതിരായ അധിക്ഷേപങ്ങളിൽ അതൃപ്തി; നീക്കിയ വീഡിയോ പുനഃസ്ഥാപിക്കാൻ ബോംബെ ഹൈക്കോടതി

പരിസ്ഥിതി സൗഹൃദ ദീപാവലി ആഘോഷിക്കണമെന്ന ആഹ്വാനത്തിന്റെ പേരിൽ ബോളിവുഡ് നടി ദിയ മിർസയ്‌ക്കെതിരെ ഭരണകക്ഷി നേതാക്കൾ നടത്തിയ വർഗീയ പരാമർശങ്ങളിലും അധിക്ഷേപങ്ങളിലും കടുത്ത അതൃപ്തി രേഖപ്പെടുത്തി ബോംബെ ഹൈക്കോടതി. ഇന്ത്യ മതേതര രാജ്യമാണെന്ന് ഓർമിപ്പിച്ച കോടതി, രാഷ്ട്രീയ സമ്മർദത്തെ തുടർന്ന് മുംബൈ നഗരസഭ (ബിഎംസി) സോഷ്യൽ മീഡിയ അക്കൗണ്ടുകളിൽ നിന്ന് നീക്കം ചെയ്ത നടിയുടെ ബോധവൽക്കരണ വീഡിയോ ഉടൻ പുനഃസ്ഥാപിക്കാൻ ഉത്തരവിട്ടു.

പുകമലിനീകരണവും പടക്കങ്ങളും ഒഴിവാക്കി പരിസ്ഥിതി സൗഹൃദമായി ദീപാവലി ആഘോഷിക്കണമെന്ന് ആഹ്വാനം ചെയ്യുന്ന വീഡിയോയിലാണ് പരിസ്ഥിതി പ്രവർത്തക കൂടിയായ ദിയ മിർസ പ്രത്യക്ഷപ്പെട്ടത്. മുംബൈ നഗരസഭയ്ക്കുവേണ്ടി തയ്യാറാക്കിയ വീഡിയോയിലൂടെ നടത്തിയ അഭ്യർഥനയ്ക്കെതിരെ മുംബൈ മേയർ ഋതു താവ്‌ഡെയും ബിജെപി നേതാക്കളും രംഗത്തെത്തുകയായിരുന്നു. ഹിന്ദു ഉത്സവങ്ങളെ മാത്രം ലക്ഷ്യമിട്ട് മലിനീകരണത്തിന്റെ പേരിൽ ഉപദേശങ്ങൾ നൽകുന്നത് അംഗീകരിക്കാനാവില്ലെന്നും നടപടി ഹിന്ദുവിരുദ്ധമാണെന്നുമായിരുന്നു അവരുടെ ആരോപണം.

ഭരണകക്ഷി നേതാക്കളുടെ എതിർപ്പിനെത്തുടർന്ന് തിങ്കളാഴ്ച ബിഎംസി ഔദ്യോഗിക സോഷ്യൽ മീഡിയ അക്കൗണ്ടുകളിൽ നിന്ന് വീഡിയോ നീക്കം ചെയ്തു. എന്നാൽ, പരിസ്ഥിതി ബോധവൽക്കരണം നടത്തിയ കലാകാരിക്കെതിരെ രാഷ്ട്രീയ നേതാക്കൾ അനാവശ്യ പ്രസ്താവനകൾ നടത്തിയതിലും അതിന് വഴങ്ങി നഗരസഭ വീഡിയോ പിൻവലിച്ചതിലും കടുത്ത വേദനയും പ്രതിഷേധവുമുണ്ടെന്ന് കേസ് പരിഗണിച്ച ഹൈക്കോടതി ബെഞ്ച് വ്യക്തമാക്കി.

ഭരണഘടന ഉറപ്പുനൽകുന്ന മതേതര മൂല്യങ്ങൾക്ക് വിരുദ്ധമാണ് ഇത്തരം നീക്കങ്ങളെന്നും വായുമലിനീകരണത്തിനെതിരെ ബോധവൽക്കരണം നടത്താൻ ഏതൊരു പൗരനും അവകാശമുണ്ടെന്നും കോടതി നിരീക്ഷിച്ചു. നീക്കം ചെയ്ത വീഡിയോ പൂർണരൂപത്തിൽ തന്നെ ബിഎംസിയുടെ ഔദ്യോഗിക സോഷ്യൽ മീഡിയ അക്കൗണ്ടുകളിൽ അടിയന്തരമായി വീണ്ടും അപ്‌ലോഡ് ചെയ്യണമെന്നും നിർദേശിച്ചു.