സമ്മർദങ്ങൾക്ക് വഴങ്ങാത്ത ഉദ്യോഗസ്ഥനെ മാറ്റി; സർക്കാരിനെ വിമർശിച്ച് എം.ബി. രാജേഷ്

എക്സൈസ് കമ്മീഷണർ സാമ്പശിവ റാവുവിനെ സ്ഥലംമാറ്റിയ നടപടിക്കെതിരെ വിമർശനവുമായി എം.ബി. രാജേഷ്. നിയമപരമായി മാത്രം പ്രവർത്തിക്കുകയും സമ്മർദങ്ങൾക്ക് വഴങ്ങാതിരിക്കുകയും ചെയ്ത ഉദ്യോഗസ്ഥനായിരുന്നു സാമ്പശിവ റാവുവെന്നും അദ്ദേഹത്തെ മാറ്റിയതിലൂടെ സത്യസന്ധരായ ഉദ്യോഗസ്ഥർക്ക് യുഡിഎഫ് സർക്കാരിൽ സ്ഥാനമില്ലെന്ന സന്ദേശമാണ് നൽകുന്നതെന്നും രാജേഷ് ആരോപിച്ചു. ഫെയ്സ്ബുക്കിൽ പങ്കുവെച്ച വീഡിയോയിലൂടെയായിരുന്നു പ്രതികരണം.

ബാർ ലൈസൻസ് പുതുക്കുന്നതുമായി ബന്ധപ്പെട്ട് മന്ത്രി എം. ലിജുവും മുഖ്യമന്ത്രിയും നടത്തിയ പരാമർശങ്ങൾ രേഖകൾ സഹിതം നേരത്തെ താൻ പൊളിച്ചുകാട്ടിയതാണെന്ന് എം.ബി. രാജേഷ് പറഞ്ഞു. എക്സൈസ് കമ്മീഷണർക്ക് ബാർ ലൈസൻസ് പുതുക്കാനുള്ള അധികാരം നൽകിയത് എൽഡിഎഫ് സർക്കാരാണെന്ന വാദം തെറ്റാണെന്നും 2011 ജൂലൈ 19ന് ഗസറ്റിൽ പ്രസിദ്ധീകരിച്ച ചട്ടം പുറത്തുവിട്ടാണ് ഇക്കാര്യം തെളിയിച്ചതെന്നും അദ്ദേഹം വ്യക്തമാക്കി.

ബാർ ലൈസൻസ് പുതുക്കാനുള്ള അധികാരം ഡെപ്യൂട്ടി എക്സൈസ് കമ്മീഷണർമാർക്ക് നൽകിയത് എൽഡിഎഫ് സർക്കാരാണെന്ന ആരോപണവും തെറ്റാണെന്ന് രാജേഷ് പറഞ്ഞു. കാലാകാലങ്ങളായി ഡെപ്യൂട്ടി കമ്മീഷണർമാർക്കാണ് ഈ അധികാരമെന്നും ഇതുമായി ബന്ധപ്പെട്ട രേഖകൾ പുറത്തുവിട്ടതോടെ മന്ത്രിക്ക് നിലപാട് തിരുത്തേണ്ടിവന്നെന്നും അദ്ദേഹം കൂട്ടിച്ചേർത്തു.