തന്റെ പാർട്ടിക്ക് ഇനി കോൺഗ്രസുമായി സഖ്യമില്ലെന്ന് ആം ആദ്മി പാർട്ടി ദേശീയ കൺവീനർ അരവിന്ദ് കെജ്‌രിവാൾ. ഗുജറാത്തിലെ ഭരണകക്ഷിയായ ബി.ജെ.പിയെ അവർ സഹായിക്കുന്നുവെന്നും അദ്ദേഹം ആരോപിച്ചു. കോൺഗ്രസ് നയിക്കുന്ന പ്രതിപക്ഷ പാർട്ടികളുടെ കൂട്ടായ്മയായ ‘ഇൻഡ്യ’ മുന്നണി കഴിഞ്ഞ വർഷത്തെ ലോക്സഭാ തെരഞ്ഞെടുപ്പിന് വേണ്ടി മാത്രമായിരുന്നുവെന്നും അദ്ദേഹം പറഞ്ഞു.
2027 ലെ ഗുജറാത്ത് നിയമസഭാ തെരഞ്ഞെടുപ്പിൽ തന്റെ പാർട്ടി മത്സരിക്കുമെന്നും അവിടെ വിജയിക്കുമെന്നും മുൻ ഡൽഹി മുഖ്യമന്ത്രി പത്രസമ്മേളനത്തിൽ പറഞ്ഞു. കാരണം സംസ്ഥാനത്തെ ജനങ്ങൾക്ക് ഇപ്പോൾ ബി.ജെ.പിയും കോൺഗ്രസും അല്ലാതെ മറ്റൊരു ഓപ്ഷൻ കൂടിയുണ്ട്.
‘കോൺഗ്രസുമായി ഞങ്ങൾക്ക് സഖ്യമില്ല. എന്തെങ്കിലും സഖ്യമുണ്ടെങ്കിൽ വിസവദറിലെ ഉപതെരഞ്ഞെടുപ്പിൽ അവർ എന്തിനാണ് മത്സരിച്ചത്? അവർ ഞങ്ങളെ പരാജയപ്പെടുത്താൻ വന്നു. ഞങ്ങളുടെ വോട്ടുകൾ വെട്ടിക്കുറച്ച് എ.എ.പിയെ പരാജയപ്പെടുത്താൻ ബി.ജെ.പി കോൺഗ്രസിനെ അയച്ചു. കോൺഗ്രസ് പരാജയപ്പെട്ടപ്പോൾ ബി.ജെ.പി അവരെ ശാസിക്കുക പോലും ചെയ്തു. ‘ഇൻഡ്യാ’ മുന്നണി ലോക്സഭാ തെരഞ്ഞെടുപ്പിന് വേണ്ടി മാത്രമായിരുന്നു. ഇപ്പോൾ ഞങ്ങളുടെ ഭാഗത്ത് നിന്ന് ഒരു സഖ്യവുമില്ല- കെജ്‌രിവാൾ പറഞ്ഞു. കഴിഞ്ഞ മാസം ജുനഗഡ് ജില്ലയിലെ വിസവദർ സീറ്റിലേക്കുള്ള ഉപതെരഞ്ഞെടുപ്പിൽ ബി.ജെ.പിയുടെ കിരിത് പട്ടേലിനെ 17,000ത്തിലധികം വോട്ടുകൾക്ക് പരാജയപ്പെടുത്തി ആം ആദ്മി നേതാവ് ഗോപാൽ ഇറ്റാലിയ വിജയിച്ചിരുന്നു. കോൺഗ്രസ് സ്ഥാനാർഥി നിതിൻ രൺപാരിയ 5,501 വോട്ടുകൾ നേടി മൂന്നാം സ്ഥാനത്തെത്തി.
30 വർഷത്തെ ഭരണത്തിൽ ബി.ജെ.പി ഗുജറാത്തിനെ നശിപ്പിച്ചുവെന്ന് കെജ്‌രിവാൾ അവകാശപ്പെട്ടു. ബി.ജെ.പിക്ക് അധികാരം നിലനിർത്താൻ കോൺഗ്രസ് സഹായിച്ചതിനാൽ പ്രതിപക്ഷമെന്ന നിലയിൽ കോൺഗ്രസ് പരാജയപ്പെട്ടുവെന്നുംഅദ്ദേഹം പറഞ്ഞു. കർഷകരായാലും യുവാക്കളായാലും മധ്യവർഗമായാലും സമൂഹത്തിലെ എല്ലാ വിഭാഗങ്ങളും ബി.ജെ.പിയിൽ അസന്തുഷ്ടരാണ്. തൊഴിലില്ലായ്മ ഉണ്ടായിരുന്നിട്ടും പകുതിയിലധികം തസ്തികകളും ഒഴിഞ്ഞുകിടക്കുന്നു.
ജോലികൾ കരാർ അടിസ്ഥാനത്തിൽ മാത്രമാണ് നൽകുന്നത്. എന്നിരുന്നാലും ആളുകൾക്ക് മറ്റ് മാർഗങ്ങളില്ലാത്തതിനാൽ ബി.ജെ.പി തെരഞ്ഞെടുപ്പുകളിൽ വിജയിച്ചുവെന്നും കെജ്‌രിവാൾ പറഞ്ഞു. വിസവദർ ഉപതിരഞ്ഞെടുപ്പിനുശേഷം ഈ രണ്ട് പാർട്ടികൾക്കും ശക്തമായ ഒരു ബദലായി എ.എ.പി ഉയർന്നുവന്നിട്ടുണ്ട്. ആളുകൾ അദ്ദേഹത്തിന്റെ പാർട്ടിയിൽ പ്രതീക്ഷകൾ അർപ്പിക്കുന്നുവെന്നും കെജ്‌രിവാൾ പറഞ്ഞു.
