സംസ്ഥാനത്തെ ക്രിസ്ത്യൻ ന്യൂനപക്ഷങ്ങളുടെ വിദ്യാഭ്യാസ, സാമ്പത്തിക പിന്നാക്കാവസ്ഥയും ക്ഷേമവുമായി ബന്ധപ്പെട്ട വിഷയങ്ങൾ പഠിക്കാൻ നിയോഗിച്ച ജെ.ബി. കോശി കമ്മീഷൻ റിപ്പോർട്ടിന്റെ അടിസ്ഥാനത്തിലുള്ള നടപടികൾ മുഖ്യമന്ത്രി പിണറായി വിജയൻ അവലോകനം ചെയ്തു. കമ്മീഷൻ നൽകിയ ശുപാർശകളിൽ 17 വകുപ്പുകൾ പൂർണമായും നടപ്പാക്കിയതായി യോഗത്തിൽ വിലയിരുത്തി. 220 ശുപാർശകളും ഉപശുപാർശകളും സംബന്ധിച്ച നടപടികൾ ഇതിനകം പൂർത്തിയായിട്ടുണ്ട്.
കമ്മീഷൻ സമർപ്പിച്ച ആകെ 284 ശുപാർശകളും 45 ഉപശുപാർശകളുമാണ് സംസ്ഥാന സർക്കാർ പരിഗണിച്ചത്. ഇതിൽ ഏഴ് ശുപാർശകൾ മന്ത്രിസഭയുടെ പരിഗണനയ്ക്കായി സമർപ്പിക്കുന്നതിനുള്ള നടപടികൾ ബന്ധപ്പെട്ട വകുപ്പുകൾ സ്വീകരിച്ചു വരുന്നതായി യോഗത്തിൽ അറിയിച്ചു.
നിലവിലുള്ള നിയമങ്ങളുടെ പരിധിയിൽ പരിഗണിക്കാൻ കഴിയുന്ന വിഷയങ്ങളിൽ വേഗത്തിൽ നടപടി സ്വീകരിച്ചതായി മുഖ്യമന്ത്രി വിലയിരുത്തി. മറ്റ് വകുപ്പുകളുമായി ചർച്ച ആവശ്യമായ വിഷയങ്ങളിൽ അടിയന്തര തീരുമാനങ്ങൾ എടുത്ത് റിപ്പോർട്ട് നടപ്പിലാക്കണമെന്ന് അദ്ദേഹം നിർദേശിച്ചു. നടപ്പാക്കാൻ കഴിയാത്ത ശുപാർശകൾ വ്യക്തമായി അറിയിക്കാനും, നടപ്പാക്കാൻ സാധിക്കുന്നവ കാലതാമസം കൂടാതെ നടപ്പാക്കാനും മുഖ്യമന്ത്രി ബന്ധപ്പെട്ട ഉദ്യോഗസ്ഥർക്ക് നിർദേശം നൽകി.
യോഗത്തിൽ ചീഫ് സെക്രട്ടറി, വിവിധ വകുപ്പ് സെക്രട്ടറിമാർ, മറ്റ് ഉന്നത ഉദ്യോഗസ്ഥർ എന്നിവർ പങ്കെടുത്തു.
