എൻഫോഴ്സ്മെന്റ് ഡയറക്ടറേറ്റിനെ (ഇഡി) മുൻനിർത്തി സി.പി.ഐ.എമ്മിനെ ഭയപ്പെടുത്താൻ നോക്കേണ്ടെന്ന് പാർട്ടി സംസ്ഥാന സെക്രട്ടറിയേറ്റ് അംഗം എം. സ്വരാജ്. ബി.ജെ.പിക്ക് എതിരെ നിൽക്കുന്ന രാഷ്ട്രീയ നേതാക്കൾക്കെതിരെ കേന്ദ്ര സർക്കാർ ഇഡിയെ കയറൂരി വിട്ടിരിക്കുകയാണെന്ന് അദ്ദേഹം ആരോപിച്ചു. തിരുവനന്തപുരത്ത് മുൻ മുഖ്യമന്ത്രി പിണറായി വിജയന്റെ വസതിയിലെ ഇഡി റെയ്ഡിന്റെ പശ്ചാത്തലത്തിൽ മാധ്യമങ്ങളോട് സംസാരിക്കുകയായിരുന്നു അദ്ദേഹം.
കോൺഗ്രസ് നേതാക്കളെ കേന്ദ്ര ഏജൻസികളെ ഉപയോഗിച്ച് വേട്ടയാടിയപ്പോൾ അവർ സംഘപരിവാറിന് മുന്നിൽ മുട്ടുമടക്കുകയാണ് ചെയ്തതെന്ന് എം. സ്വരാജ് വിമർശിച്ചു. "ഇഡി എന്ന് കേട്ടാൽ കുനിഞ്ഞ ശിരസ്സുമായി ബി.ജെ.പി ഓഫീസിലേക്ക് നടന്നുപോകുന്ന കോൺഗ്രസ് നേതാക്കളെ മാത്രമേ നരേന്ദ്ര മോദിക്ക് പരിചയമുള്ളൂ. അങ്ങനെ മുട്ടിലിഴഞ്ഞ പല കോൺഗ്രസുകാരും പിന്നീട് ബി.ജെ.പിയിൽ മന്ത്രിമാരും മുഖ്യമന്ത്രിമാരുമായി മാറി. എന്നാൽ, അവസാന ശ്വാസം വരെ നെഞ്ചുവിരിച്ച് പോരാടുന്ന ഇടതുമുന്നണി നേതാക്കളെ നരേന്ദ്ര മോദി ഇതുവരെ കണ്ടിട്ടില്ല. അതുകൊണ്ട് ആ ഭരണിയിലെ പാമ്പുകളെ കാട്ടി ഇങ്ങോട്ട് പേടിപ്പിക്കാൻ വരേണ്ട," സ്വരാജ് വ്യക്തമാക്കി.
ഇന്ത്യാ മുന്നണിയിലെ ഘടകകക്ഷി നേതാക്കളുടെ വീടുകളിൽ എന്തുകൊണ്ട് ഇഡി റെയ്ഡ് നടത്തുന്നില്ലെന്ന് ചോദിച്ച രാഹുൽ ഗാന്ധിയുടെ നിലപാടിനെയും സ്വരാജ് രൂക്ഷമായി പരിഹസിച്ചു. രാഹുൽ ഗാന്ധി സംഘപരിവാറിന് മുന്നിൽ സാഷ്ടാംഗം പ്രണാമം ചെയ്തപ്പോഴാണ് നാഷണൽ ഹെറാൾഡ് കേസിന്റെയും റോബർട്ട് വധേരയുടെ ഭൂമി തട്ടിപ്പ് കേസിന്റെയും അന്വേഷണങ്ങൾ പെട്ടെന്ന് മന്ദഗതിയിലായതെന്ന് സ്വരാജ് കുറ്റപ്പെടുത്തി.
കേന്ദ്ര ഏജൻസികളെ ഉപയോഗിച്ച് രാഷ്ട്രീയ എതിരാളികളെ നിശ്ശബ്ദരാക്കാനുള്ള ബി.ജെ.പിയുടെ നീക്കങ്ങളെയും ഇഡി വേട്ടയെയും ജനങ്ങളെ അണിനിരത്തിക്കൊണ്ട് രാഷ്ട്രീയമായി തന്നെ നേരിടുമെന്നും എം. സ്വരാജ് കൂട്ടിച്ചേർത്തു.
