ധനമന്ത്രി കെ. എൻ. ബാലഗോപാൽ സഞ്ചരിച്ച കാർ അപകടത്തിൽപ്പെട്ട സംഭവത്തിൽ, മന്ത്രിയുടെ വാഹനത്തിൽ ഇടിച്ച കാർ ഡ്രൈവർ മദ്യപിച്ചിരുന്നതായി കണ്ടെത്തി. പത്തനംതിട്ട ഇലന്തൂർ സ്വദേശിയായ മാത്യു തോമസിനെതിരെ വെഞ്ഞാറമൂട് പോലീസ് കേസെടുത്തിട്ടുണ്ട്. ഇന്നലെ രാത്രി വാമനപുരത്ത് വെച്ചാണ് അപകടമുണ്ടായത്. ടാറ്റ നെക്സോൺ ഇ വി കാർ പോലീസ് കസ്റ്റഡിയിലെടുത്തിട്ടുണ്ട്. ഇയാൾ മദ്യപിച്ചിരുന്നതായി വൈദ്യപരിശോധനയിൽ സ്ഥിരീകരിക്കുകയായിരുന്നു.

അതേസമയം മറ്റൊരു കാറിൽ ഇടിച്ച ശേഷമാണ്, എതിരെ വന്ന മന്ത്രിയുടെ വാഹനത്തിലേക്ക് ഈ ടാറ്റ നെക്സോൺ ഇ.വി. കാർ ഇടിച്ചുകയറിയത്. ഈ അപകടത്തിൽ മന്ത്രിയടക്കമുള്ളവർ പരിക്കേൽക്കാതെ രക്ഷപ്പെട്ടു. തുടർന്ന്, തൊട്ടുപിന്നാലെ എത്തിയ ജി. സ്റ്റീഫൻ എം.എൽ.എയുടെ വാഹനത്തിലാണ് മന്ത്രി തിരുവനന്തപുരത്തേക്ക് യാത്ര തുടർന്നത്. കസ്റ്റഡിയിലെടുത്ത ശേഷം ഇയാളെ ഇന്നലെ രാത്രി തന്നെ വിട്ടയച്ചു.