സംസ്ഥാനത്തെ നിയമസഭാ തിരഞ്ഞെടുപ്പിലെ ദയനീയ പരാജയത്തിന് പിന്നാലെ ആർ.എസ്.പി യു.ഡി.എഫ് വിടുമെന്ന സൂചന നൽകി പാർട്ടി അഖിലേന്ത്യ സെക്രട്ടേറിയറ്റ് അംഗവും, കൊല്ലം എംപിയുമായ എൻ.കെ പ്രേമചന്ദ്രൻ. യു.ഡി.എഫിൽ ആകെയുണ്ടായിരുന്ന കെട്ടുറപ്പിന്റേയും സംഘടനാ സംവിധാനത്തിന്റെയും ഭാഗമാണ് ഇപ്പോഴത്തെ തോൽവിയെന്ന് ഒരു മാധ്യമത്തിന് നൽകിയ അഭിമുഖത്തിൽ എൻ.കെ പ്രേമചന്ദ്രൻ പറഞ്ഞു.

ആർഎസ്പി ഇനിയും യു.ഡി.എഫിൽ തുടരുന്നത് അണികൾക്കിടയിൽ ആശങ്കയുണ്ടാക്കിയിട്ടുണ്ടെന്നും പാർലമെന്റിൽ പ്രാതിനിധ്യമുള്ളത് കൊണ്ട് സംസ്ഥാന പാർട്ടിയെന്ന നിലക്കുള്ള അംഗീകാരം നിലനിർത്താൻ കഴിയുമെന്നും എൻ.കെ പ്രേമചന്ദ്രൻ പറഞ്ഞു.

മുന്നണിമാറ്റം എന്ന ചർച്ച പല കേന്ദ്രങ്ങളിൽ നിന്നും ഉയർന്നു വന്നു . നിയമസഭയിൽ പ്രാതിനിധ്യം ഇല്ലാത്തതിന്റെ പേരിൽ പ്രാദേശിക തലത്തിൽ പ്രവർത്തകർക്ക് പോലും പരിഗണന ലഭിക്കാത്ത പ്രശ്‌നമുണ്ടെന്ന് അദ്ദേഹം പറഞ്ഞു.