കെ.പി.സി.സി പ്രസിഡന്റ് കെ. സുധാകരന്റെ സാമ്പത്തിക ഇടപാടുകൾ അന്വേഷിക്കണമെന്ന് ആവശ്യപ്പെട്ട് വിജിലൻസിന് പരാതി.കെ. സുധാകരന്റെ മുൻ ഡ്രൈവർ കൂടിയായ പ്രശാന്ത് ബാബുവാണ് പരാതിക്കാരൻ.കെ. കരുണാകരൻ ട്രസ്റ്റിന്റെ പേരിലും ഡി.സി.സി ഓഫീസ് നിർമാണത്തിനുമായി കോടിക്കണക്കിന് രൂപ സുധാകരൻ പിരിച്ചെടുത്തെന്നാണ് പരാതിയിലുള്ളത്.

സുധാകരൻറെ സാമ്പത്തിക അഴിമതി സംബന്ധിച്ച്‌ അന്വേഷണം നടത്തി കേസ് രജിസ്റ്റർ ചെയ്യണമെന്നാണ് പരാതിയിലെ ആവശ്യം. കെ. കരുണാകരൻ ട്രസ്റ്റിൻറെ പേരിൽ 32 കോടി രൂപ സുധാകരനും അനുയായികളും ചേർന്ന് പിരിച്ചെടുത്തെന്നും ഈ പണം സുധാകരൻ സ്വന്തം ആവശ്യത്തിനായി ഉപയോഗിച്ചെന്നുമാണ് പരാതിയിലെ പ്രധാന ആരോപണം. കണ്ണൂർ ഡി.സി.സി ഓഫീസ് നിർമാണത്തിനായി വിദേശത്ത് നിന്നടക്കം സംഭാവനയായി ലഭിച്ച തുകയും സുധാകരൻ വകമാറ്റി ചെലവഴിച്ചെന്ന് പ്രശാന്ത് പറയുന്നു.

കോളജ് പഠന കാലത്തെ രാഷ്ട്രീയ ഏറ്റുമുട്ടലുകളെ ചൊല്ലി പിണറായി വിജയനും കെ. സുധാകരനും വാഗ്വാദങ്ങൾ തുടരുന്നതിനിടെയാണ് സുധാകരനെതിരെ അന്വേഷണം ആവശ്യപ്പെട്ട് മുൻ ഡ്രൈവർ പ്രശാന്ത് ബാബു വിജിലൻസിനെ സമീപിച്ചിരിക്കുന്നത്. അന്വേഷണം നടന്നാൽ ഇത് സംബന്ധിച്ച തെളിവുകൾ ഹാജരാക്കാൻ തയ്യാറാണെന്നും പ്രശാന്ത് ബാബു പറഞ്ഞു. മുൻപ് നാൽപ്പാടി വാസു വധക്കേസുമായി ബന്ധപ്പെട്ട് സുധാകരനെതിരെ ഗുരുതരമായ ആരോപണം ഉന്നയിച്ച ആളാണ് പ്രശാന്ത് ബാബു.