കോൺഗ്രസിൽ നിന്നും വിട്ട് സിപിഎമ്മിലെത്തിയ മുൻ കെപിസിസി സെക്രട്ടറി പി എസ് പ്രശാന്തിന് ചുമതല നൽകി സി പി എം. കർഷക സംഘം തിരുവനന്തപുരം ജില്ലാ വൈസ് പ്രസിഡന്റ് ആയിട്ടാണ് ചുമതല നൽകിയത്. വൈകാതെ തന്നെ പി എസ് പ്രശാന്തിനെ കാൻഡിഡേറ്റ് അംഗമാക്കി പിന്നീട് പാർട്ടി അംഗത്വത്തിലേക്ക് കൊണ്ടുവരാനുളള തീരുമാനം കൈകൊളളുമെന്നാണ് സിപിഎം അറിയിക്കുന്നത്.
സമാനമായി കോൺഗ്രസിൽ നിന്ന് സിപിഎമ്മിലെത്തിയ ജി രതികുമാറിനും കെ പി അനിൽകുമാറിനും അവർ പ്രവർത്തിക്കുന്ന ജില്ലകളിൽ ഇത്തരത്തിൽ പദവികൾ നൽകുമെന്നും സിപിഎം വ്യക്തമാക്കി.
നീണ്ട വർഷത്തെ കോൺഗ്രസ് ബന്ധം ഉപേക്ഷിച്ചാണ് പി എസ് പ്രശാന്ത് സി പി എമ്മിൽ ചേർന്നത്. നെടുമങ്ങാട് യു ഡി എഫ് സ്ഥാനാർഥിയായി മൽസരിച്ച പ്രശാന്തിനെ തോൽപിക്കാൻ പാലോട് രവി അടക്കം കോൺഗ്രസ് നേതാക്കൾ ശ്രമിച്ചുവെന്നും ഇവരെ ഔദ്യോഗിക സ്ഥാനങ്ങളിലേക്ക് കൊണ്ടുവരരുതെന്നും പ്രശാന്ത് രേഖാമൂലം കെ പി സി സി, എ ഐ സി സി നേതൃത്വങ്ങളോട് ആവശ്യപ്പെട്ടിരുന്നു. എങ്കിലും പാലോട് രവിയെ തിരുവനന്തപുരം ഡി സി സി അധ്യക്ഷനാക്കിയതോടെ പ്രശാന്ത് കോൺഗ്രസിൽ നിന്നും രാജി വയ്ക്കുകയായിരുന്നു.
