കിഫ്ബി പദ്ധതികൾ പല സ്ഥലങ്ങളിലും നിലച്ചു; വികസന പ്രവർത്തനങ്ങൾ തടയരുതെന്ന് കെ.എൻ. ബാലഗോപാൽ

സംസ്ഥാനത്തെ പല സ്ഥലങ്ങളിലും കിഫ്ബിയുടെ പ്രവർത്തനങ്ങൾ നടക്കുന്നില്ലെന്ന് എംഎൽഎ കെ.എൻ. ബാലഗോപാൽ. കിഫ്ബിയുമായി ബന്ധപ്പെട്ട അടിയന്തര പ്രമേയം അവതരിപ്പിച്ച് നിയമസഭയിൽ സംസാരിക്കുകയായിരുന്നു അദ്ദേഹം. കിഫ്ബിയെ തകർക്കരുതെന്നും നിലവിലുള്ള വികസന പദ്ധതികൾ തടസ്സമില്ലാതെ മുന്നോട്ടുകൊണ്ടുപോകണമെന്നും അദ്ദേഹം ആവശ്യപ്പെട്ടു.

കഴിഞ്ഞ പത്ത് വർഷത്തിനിടെ കിഫ്ബിയിലൂടെ സംസ്ഥാനത്ത് വലിയ മാറ്റങ്ങളുണ്ടായെന്ന് ബാലഗോപാൽ പറഞ്ഞു. ദേശീയപാതയുടെ വികസനത്തിന് കിഫ്ബിയുടെ സഹായം നിർണായകമായിരുന്നു. മലയോര മേഖലകളിൽനിന്ന് തലസ്ഥാനത്തേക്ക് എത്താനുള്ള യാത്രാസമയം കുറഞ്ഞതും വികസനത്തിന്റെ ഭാഗമാണെന്ന് അദ്ദേഹം ചൂണ്ടിക്കാട്ടി. രാഷ്ട്രീയ വ്യത്യാസങ്ങൾ പരിഗണിക്കാതെ മണ്ഡലങ്ങളിൽ കിഫ്ബി പദ്ധതികൾക്ക് മുൻ സർക്കാർ പണം അനുവദിച്ചിരുന്നുവെന്നും എന്നാൽ ഇപ്പോൾ നിലവിലുള്ള പ്രവൃത്തികൾ നിർത്തിവയ്ക്കുന്ന സാഹചര്യമാണുള്ളതെന്നും അദ്ദേഹം ആരോപിച്ചു.

കിഫ്ബിയോട് തുടക്കംമുതൽ പ്രതിപക്ഷ നേതാവ് വി.ഡി. സതീശന് എതിർപ്പാണെന്നും ബാലഗോപാൽ വിമർശിച്ചു. കേരളത്തിലെ വികസന റോഡുകൾ സിനിമകളിൽപ്പോലും കാണിക്കുന്നുണ്ടെന്നും അവ യാഥാർഥ്യമായത് എങ്ങനെയാണെന്ന് ഓർക്കണമെന്നും അദ്ദേഹം പറഞ്ഞു.

ഭൂമി ഏറ്റെടുക്കലുമായി ബന്ധപ്പെട്ട വിമർശനങ്ങൾക്കും ബാലഗോപാൽ മറുപടി നൽകി. നിലവിലുള്ള നിയമങ്ങൾക്കു വിധേയമായിട്ടേ ഭൂമി ഏറ്റെടുക്കാൻ കഴിയൂവെന്നും ബദൽ നിർദേശങ്ങളില്ലാതെ വിമർശനം ഉന്നയിച്ചിട്ട് കാര്യമില്ലെന്നും അദ്ദേഹം വ്യക്തമാക്കി.

കിഫ്ബിയുടെ വായ്പ പൊതുവായ്പയിൽ ഉൾപ്പെടുത്തിയതുമായി ബന്ധപ്പെട്ട വിഷയവും അദ്ദേഹം ഉന്നയിച്ചു. കേരളത്തിന്റെ വായ്പാവിഹിതം വെട്ടിക്കുറച്ചതിനെതിരെ കോടതിയെ സമീപിച്ച മുൻ സർക്കാരിന്റെ നടപടികളെ പരാമർശിച്ച അദ്ദേഹം, അന്ന് യുഡിഎഫ് സ്വീകരിച്ച നിലപാട് എന്തായിരുന്നുവെന്നും ചോദിച്ചു. കിഫ്ബിയെ തകർക്കുന്ന സമീപനം സർക്കാർ സ്വീകരിക്കരുതെന്നും ഭസ്മാസുരന് വരം നൽകിയതുപോലുള്ള സാഹചര്യം ഉണ്ടാകരുതെന്നും അദ്ദേഹം മുന്നറിയിപ്പ് നൽകി.

കണ്ണൂരിൽ ഭൂമി ഏറ്റെടുക്കുന്നതിനെ വ്യവസായ മന്ത്രി പോലും പിന്തുണച്ചിട്ടുണ്ടെന്ന് ബാലഗോപാൽ പറഞ്ഞു. വിഷയത്തെ രാഷ്ട്രീയമായി കാണാതെ വികസനത്തിന്റെ ഭാഗമായി പരിഗണിക്കണമെന്നും അദ്ദേഹം ആവശ്യപ്പെട്ടു. കിഫ്ബിയുടെ പ്രവർത്തനങ്ങൾ പല സ്ഥലങ്ങളിലും നിലച്ചിരിക്കുന്ന സാഹചര്യം അടിയന്തരമായി ചർച്ച ചെയ്യണമെന്നും നിലവിലുള്ള പദ്ധതികൾ തടസ്സമില്ലാതെ പൂർത്തിയാക്കണമെന്നും അദ്ദേഹം പ്രമേയത്തിലൂടെ ആവശ്യപ്പെട്ടു.