കാലടി സർവകലാശാല സമരം: മീഡിയവണ്ണിനെതിരെ നുണപ്രചാരണ ആരോപണവുമായി കെ.എസ്. അരുണ്കുമാർ
കാലടി ശ്രീശങ്കരാചാര്യ സംസ്കൃത സർവകലാശാലയിലെ വിദ്യാർഥി സമരവുമായി ബന്ധപ്പെട്ട് വൈസ് ചാൻസലറെയും ഉന്നതവിദ്യാഭ്യാസ മന്ത്രിയെയും സംരക്ഷിക്കാൻ മീഡിയവൺ ചാനൽ നുണപ്രചാരണം നടത്തുന്നുവെന്ന് കെ.എസ്. അരുണ്കുമാർ. സർവകലാശാലയിലെ വിദ്യാർഥിവിരുദ്ധ നിലപാടുകൾ സ്വീകരിക്കുന്ന വൈസ് ചാൻസലറെയും മന്ത്രിയെയും സംരക്ഷിക്കാനാണ് ചാനലിന്റെ ശ്രമമെന്ന് ആരോപിച്ച് അദ്ദേഹം ഫേസ്ബുക്കിൽ കുറിപ്പ് പങ്കുവെച്ചു.
സർവകലാശാലയിലെ അടിസ്ഥാന സൗകര്യങ്ങൾ മെച്ചപ്പെടുത്തണമെന്നാവശ്യപ്പെട്ട് വിദ്യാർഥികൾ നടത്തുന്ന സമരം നാലുമാസം പിന്നിട്ടിരിക്കുകയാണ്. പ്രതീകാത്മക നാടകം അവതരിപ്പിച്ചതിന്റെ പേരിൽ സസ്പെൻഡ് ചെയ്യപ്പെട്ട വിദ്യാർഥികൾ ആരംഭിച്ച അനിശ്ചിതകാല നിരാഹാര സമരം 16 ദിവസം പിന്നിട്ടപ്പോഴാണ് മീഡിയവണ്ണിന്റെ വാർത്തയിലൂടെ തെറ്റായ പ്രചാരണം നടന്നതെന്നാണ് അരുണ്കുമാറിന്റെ ആരോപണം.
2024ലെ ഓണാഘോഷത്തിനിടെ മദ്യപിച്ച് ക്യാമ്പസിലെത്തി വിദ്യാർഥികളെ ഭീഷണിപ്പെടുത്തുകയും ആക്രമിക്കുകയും ചെയ്ത സംഭവത്തിലാണ് ആറുപേരെ സസ്പെൻഡ് ചെയ്തതെന്ന് അദ്ദേഹം വിശദീകരിച്ചു. ഒരു വിദ്യാർഥിയെ വിവസ്ത്രനാക്കി മർദിക്കുകയും കൊല്ലുമെന്ന് ഭീഷണിപ്പെടുത്തുകയും ചെയ്തതായും പരാതിയുണ്ടായിരുന്നു. 2024 സെപ്റ്റംബർ 19ന് സർവകലാശാലയിലെ എംഎസ്ഡബ്ല്യു, ബിഎസ്ഡബ്ല്യു വിദ്യാർഥികളാണ് ഇതുസംബന്ധിച്ച് പരാതി നൽകിയതെന്നും അരുണ്കുമാർ കുറിച്ചു.
പരാതിയുടെ അടിസ്ഥാനത്തിൽ സർവകലാശാല നിയോഗിച്ച അന്വേഷണ കമ്മീഷൻ ആരോപണവിധേയരായ വിദ്യാർഥികൾക്ക് മെമ്മോ നൽകുകയും 15 ദിവസത്തിനകം വിശദീകരണം സമർപ്പിക്കാൻ ആവശ്യപ്പെടുകയും ചെയ്തിരുന്നു. എന്നാൽ ഒരാളൊഴികെ മറ്റാരും അന്വേഷണ കമ്മീഷനുമായി സഹകരിക്കുകയോ വിശദീകരണം നൽകുകയോ ചെയ്തില്ലെന്നാണ് അരുണ്കുമാറിന്റെ വാദം. സർവകലാശാലയുടെ നടപടികൾക്ക് മറുപടി നൽകാതെ പഠനം അവസാനിപ്പിച്ച് ക്യാമ്പസ് വിട്ടവരെയാണ് ഇപ്പോൾ വെള്ളപൂശാൻ ശ്രമിക്കുന്നതെന്നും അദ്ദേഹം ആരോപിച്ചു.
മുൻകാലങ്ങളിൽ സർവകലാശാലയിൽ വിദ്യാർഥികൾക്കെതിരെ സ്വീകരിച്ച സസ്പെൻഷൻ നടപടികളെക്കുറിച്ചുള്ള മീഡിയവണ്ണിന്റെ റിപ്പോർട്ടും വസ്തുതാവിരുദ്ധമാണെന്ന് അരുണ്കുമാർ കുറ്റപ്പെടുത്തി. ഇടതുപക്ഷ സിൻഡിക്കേറ്റ് വിദ്യാർഥികളോട് അനുഭാവപൂർവമായ സമീപനം സ്വീകരിച്ചില്ലെന്ന തരത്തിൽ മുൻ ഉന്നതവിദ്യാഭ്യാസ മന്ത്രിയുടെ ചിത്രം ഉപയോഗിച്ച് വാർത്ത നൽകിയതും വ്യാജപ്രചാരണമാണെന്ന് അദ്ദേഹം ആരോപിച്ചു.
അടിസ്ഥാന സൗകര്യ വികസനം ആവശ്യപ്പെട്ട് സമരം ചെയ്യുന്ന വിദ്യാർഥികളെ മുൻകാല ക്രിമിനൽ ആരോപണങ്ങൾ നേരിട്ടവരുമായി താരതമ്യം ചെയ്ത് നിലവിലെ സമരത്തിന്റെ ജനപിന്തുണ തകർക്കാനാണ് ചാനലിന്റെ ശ്രമമെന്നും അരുണ്കുമാർ ഫേസ്ബുക്ക് കുറിപ്പിൽ ആരോപിച്ചു.