ഇന്ത്യാ മുന്നണിയിൽ അവഗണനയെന്ന് മുസ്‌ലിം ലീഗ്; കെ.സി. വേണുഗോപാലിനെതിരെ അതൃപ്തി, ഹൈക്കമാൻഡിനെ സമീപിക്കാൻ നീക്കം

ഇന്ത്യാ മുന്നണിയിൽ അർഹമായ രാഷ്ട്രീയ പരിഗണന ലഭിക്കുന്നില്ലെന്ന പരാതിയുമായി ഇന്ത്യൻ യൂണിയൻ മുസ്‌ലിം ലീഗ് (ഐയുഎംഎൽ). മുന്നണിയുടെ പ്രധാന പരിപാടികളിലും പ്രതിനിധി സംഘങ്ങളിലും സമിതികളിലും ദേശീയ നേതാക്കളെ തുടർച്ചയായി ഒഴിവാക്കുന്നതിന് പിന്നിൽ കോൺഗ്രസ് നേതൃത്വത്തിന്റെ ഇടപെടലുണ്ടെന്നാണ് ലീഗിന്റെ വിലയിരുത്തൽ. എഐസിസി ജനറൽ സെക്രട്ടറി കെ.സി. വേണുഗോപാലാണ് ഇതിന് പിന്നിലെന്നും കോൺഗ്രസിന്റെ പ്രധാന സഖ്യകക്ഷിയായ ലീഗിനെ ബോധപൂർവം അവഗണിക്കുകയാണെന്നും പാർട്ടി നേതൃത്വം സംശയിക്കുന്നു. വിഷയം കോൺഗ്രസ് ഹൈക്കമാൻഡിന്റെ ശ്രദ്ധയിൽപ്പെടുത്തി അതൃപ്തി അറിയിക്കാനാണ് നീക്കം.

മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ ഡൽഹിയിൽ ഇന്ത്യാ മുന്നണി നടത്തിയ പ്രതിഷേധങ്ങളാണ് ലീഗിന്റെ അതൃപ്തി വർധിപ്പിച്ചത്. രാഷ്ട്രപതി ദ്രൗപദി മുർമുവിന് പരാതി നൽകാൻ നിശ്ചയിച്ച പ്രതിനിധി സംഘത്തിൽനിന്ന് അവസാന നിമിഷം ലീഗ് എംപി ഇ.ടി. മുഹമ്മദ് ബഷീറിനെ ഒഴിവാക്കിയതാണ് ആദ്യ തിരിച്ചടിയായത്. തുടർന്ന് രാംലീല മൈതാനിയിൽ നടന്ന 'ഡൽഹി ചലോ' റാലിയിൽ ദേശീയ ജനറൽ സെക്രട്ടറി പി.കെ. കുഞ്ഞാലിക്കുട്ടിക്ക് പ്രസംഗിക്കാൻ അവസരം നൽകാത്തതും ലീഗ് അവഹേളനമായി കാണുന്നു. സിപിഎം ദേശീയ ജനറൽ സെക്രട്ടറി എം.എ. ബേബിക്ക് പ്രസംഗിക്കാൻ അവസരം നൽകിയപ്പോഴാണ് കുഞ്ഞാലിക്കുട്ടിയെ ഒഴിവാക്കിയത്. ഇന്ത്യാ മുന്നണിയുടെ വിദ്യാർഥി-യുവജന ഏകോപന സമിതിയിൽ മുസ്‌ലിം യൂത്ത് ലീഗിനെയും എംഎസ്എഫിനെയും ഉൾപ്പെടുത്താത്തതും പാർട്ടി ചൂണ്ടിക്കാട്ടുന്നു.

കെ.സി. വേണുഗോപാലിന്റെ ഇടപെടലാണ് അവഗണനയ്ക്ക് പിന്നിലെന്ന കാര്യത്തിൽ സംശയമില്ലെന്ന് മുതിർന്ന ലീഗ് നേതാവ് 'ദ ന്യൂ ഇന്ത്യൻ എക്സ്പ്രസിനോട്' പറഞ്ഞു. ഡൽഹിയിലെ പ്രതിഷേധങ്ങളിൽ കോൺഗ്രസ് പ്രവർത്തകർക്കൊപ്പം ലീഗ് നേതാക്കളും പ്രവർത്തകരും സജീവമായി പങ്കെടുത്തിട്ടും ഹൈക്കമാൻഡിൽനിന്ന് അവഗണന നേരിടേണ്ടിവന്നത് കടുത്ത അപമാനമാണെന്നും അദ്ദേഹം പ്രതികരിച്ചു. വിഷയം രാഹുൽ ഗാന്ധിയുടെയോ പ്രിയങ്ക ഗാന്ധിയുടെയോ ശ്രദ്ധയിൽ ഇതുവരെ കൊണ്ടുവന്നിട്ടില്ല. പാർട്ടി പ്രസിഡന്റ് സയ്യിദ് സാദിഖലി ശിഹാബ് തങ്ങൾ തിരിച്ചെത്തിയശേഷം കോൺഗ്രസ് ഹൈക്കമാൻഡുമായി കൂടിക്കാഴ്ച നടത്തി വിഷയം ചർച്ച ചെയ്യുമെന്നും നേതാവ് വ്യക്തമാക്കി.

ലീഗിന്റെ അതൃപ്തിക്ക് കേരളത്തിലെ കോൺഗ്രസ് നേതാക്കളിൽ ഒരു വിഭാഗത്തിന്റെയും പിന്തുണയുണ്ട്. പൊന്നാനി എംഎൽഎയും കോൺഗ്രസ് നേതാവുമായ കെ.പി. നൗഷാദ് അലി ഫെയ്സ്ബുക്ക് കുറിപ്പിലൂടെ ലീഗിന് പിന്തുണയുമായി രംഗത്തെത്തി. 1969 മുതൽ കോൺഗ്രസിന്റെ സഖ്യകക്ഷിയായി തുടരുന്ന മുസ്‌ലിം ലീഗിന്റെ രാഷ്ട്രീയ പ്രാധാന്യം അവഗണിക്കരുതെന്നും ഇന്ത്യാ മുന്നണിയിലെ ഏറ്റവും പഴക്കമേറിയ സഖ്യകക്ഷികളിലൊന്നാണ് ലീഗെന്നും അദ്ദേഹം ചൂണ്ടിക്കാട്ടി.

കേരളത്തിലെ മുഖ്യമന്ത്രി സ്ഥാനത്തെച്ചൊല്ലിയുള്ള ചർച്ചയിൽ വി.ഡി. സതീശനെ പിന്തുണച്ചതാണ് കെ.സി. വേണുഗോപാലിന് ലീഗിനോടുള്ള അതൃപ്തിക്ക് കാരണമെന്നാണ് മലബാറിൽ നിന്നുള്ള മുതിർന്ന കോൺഗ്രസ് നേതാവിന്റെ ആരോപണം. രാഹുൽ ഗാന്ധിയും പ്രിയങ്ക ഗാന്ധിയും ഉൾപ്പെടെയുള്ള ദേശീയ നേതാക്കൾ ഈ അവഗണനയെക്കുറിച്ച് അറിഞ്ഞിട്ടില്ലെന്നാണ് തന്റെ വിവരമെന്നും അദ്ദേഹം പറഞ്ഞു. കേരളത്തിലും ദേശീയതലത്തിലും കോൺഗ്രസിന്റെ പ്രധാന സഖ്യകക്ഷിയായ ലീഗുമായുള്ള പ്രശ്നം വേഗത്തിൽ പരിഹരിക്കണമെന്നും നേതാവ് അഭിപ്രായപ്പെട്ടു.