എൽ.ഡി.എഫിനെ രാഷ്ട്രീയമായി നേരിടാൻ കഴിയാത്തതിനാലാണ് മന്ത്രിയെ കായികമായി ആക്രമിച്ച് കൊലപ്പെടുത്താൻ ശ്രമിക്കുന്ന ഹീനമായ മാർഗം കോൺഗ്രസ് സ്വീകരിച്ചതെന്ന് സി.പി.ഐ.എം സംസ്ഥാന സെക്രട്ടറിയേറ്റ് പ്രസ്താവനയിൽ ആരോപിച്ചു. സംഭവം അങ്ങേയറ്റം പ്രതിഷേധാർഹവും അപലപനീയവുമാണെന്നും, കേരളത്തിന്റെ ചരിത്രത്തിൽ ആദ്യമായാണ് ഒരു വനിതാ മന്ത്രി ആക്രമിക്കപ്പെടുന്നതെന്നും പ്രസ്താവനയിൽ ചൂണ്ടിക്കാട്ടി.
വരാനിരിക്കുന്ന നിയമസഭാ തെരഞ്ഞെടുപ്പിൽ നേരിടേണ്ടി വരുന്ന പരാജയഭീതിയാണ് യു.ഡി.എഫിനെയും കോൺഗ്രസിനെയും അക്രമ സമരങ്ങളിലേക്ക് നയിക്കുന്നതെന്ന് സി.പി.ഐ.എം ആരോപിച്ചു. കണ്ണൂർ റെയിൽവേ സ്റ്റേഷനിൽ കയറി ആരോഗ്യമന്ത്രി Veena Georgeയെ ആക്രമിച്ച ക്രിമിനലുകളെ കോൺഗ്രസ് പ്രേരിപ്പിച്ചതാണെന്നും പ്രസ്താവനയിൽ പറയുന്നു. മന്ത്രിയെ നിരന്തരം പിന്തുടർന്ന് വേട്ടയാടുകയാണെന്നും, നിയമസഭയിലും പുറത്തും കോൺഗ്രസ് നേതാക്കൾ നടത്തുന്ന ആക്രമണപരമായ പ്രചാരണങ്ങളുടെ തുടർച്ചയായാണ് യൂത്ത് കോൺഗ്രസ്, കെ.എസ്.യു പ്രവർത്തകരുടെ നടപടികളെന്നും ആരോപിച്ചു.
തിരുവനന്തപുരത്തെ ഔദ്യോഗിക വസതിയിൽ റീത്ത് വയ്ക്കുകയും ഗേറ്റ് തകർക്കുകയും ചെയ്ത സംഭവങ്ങൾ ഉൾപ്പെടെ മന്ത്രിയെ അപായപ്പെടുത്താനുള്ള ശ്രമങ്ങളാണെന്ന് ഇപ്പോൾ വ്യക്തമായിക്കൊണ്ടിരിക്കുകയാണെന്നും പ്രസ്താവനയിൽ പറയുന്നു. കണ്ണൂരിൽ കണ്ടത് സാധാരണ സംഘടനാപ്രതിഷേധമല്ല, അക്രമികൾ കൂട്ടത്തോടെ നടത്തിയ അതിക്രമമാണെന്നും സി.പി.ഐ.എം വിലയിരുത്തി.
വീണാ ജോർജിനെ നിരന്തരം ലക്ഷ്യമിടുന്നതെന്തിനാണെന്ന് കോൺഗ്രസ് ജനങ്ങളോട് വ്യക്തമാക്കണമെന്നും പാർട്ടി ആവശ്യപ്പെട്ടു. ആരോഗ്യ മേഖലയെ ശക്തിപ്പെടുത്തിയതും പൊതുആശുപത്രികളെ സൂപ്പർ സ്പെഷ്യാലിറ്റി നിലവാരത്തിലേക്ക് ഉയർത്തിയതുമാണ് അവരുടെ “കുറ്റം” എന്നാണ് പരിഹാസം. ചില അപൂർവ്വ സംഭവങ്ങളെ പെരുപ്പിച്ച് കാണിച്ച് മന്ത്രിയെ പ്രതിക്കൂട്ടിലാക്കാൻ ശ്രമിക്കുന്നതായും പ്രസ്താവനയിൽ ആരോപിക്കുന്നു. പ്രശ്നങ്ങൾ ഉയർന്നപ്പോൾ കുറ്റം ചുമത്തൽ രാഷ്ട്രീയത്തിലേക്ക് പോകാതെ അടിയന്തര പരിഹാരത്തിനാണ് മന്ത്രി ശ്രമിച്ചതെന്നും വ്യക്തമാക്കി.
അക്രമ രാഷ്ട്രീയത്തെയും ആഭാസ സമരങ്ങളെയും ജനകീയ പ്രതിഷേധം കൊണ്ട് നേരിടുമെന്നും, ജനാധിപത്യപരവും സമാധാനപരവുമായ പ്രതിഷേധങ്ങൾ സംസ്ഥാനത്തുടനീളം ഉയരുമെന്നും സി.പി.ഐ.എം അറിയിച്ചു. നയപരമായും രാഷ്ട്രീയ നിലപാടുകളിലൂടെയും ജനങ്ങളെ ബോധ്യപ്പെടുത്തി പ്രവർത്തിക്കേണ്ടതിനുപകരം നുണയും അക്രമവും ആശ്രയിക്കുന്ന നിലപാട് കോൺഗ്രസ് അവസാനിപ്പിക്കണമെന്നും പ്രസ്താവനയിൽ കൂട്ടിച്ചേർത്തു.
