കേരളത്തിന്റെ വികസനത്തിന് അതിവേഗ റെയിൽപാത അനിവാര്യമാണെന്നും പദ്ധതി ഏത് പേരിൽ നടപ്പാക്കിയാലും സി.പി.എം പിന്തുണയ്ക്കുമെന്നും സംസ്ഥാന സെക്രട്ടേറിയറ്റ് അംഗം എം.വി. ജയരാജൻ. കെ-റെയിൽ പദ്ധതിക്ക് ബദലായി ‘ഇന്ത്യ റെയിൽ’ എന്ന പേരിൽ പദ്ധതി വന്നാലും അതിനെ സ്വാഗതം ചെയ്യുന്നുവെന്ന് അദ്ദേഹം വ്യക്തമാക്കി.
വികസന പദ്ധതികളെ തകർക്കുന്ന സമീപനമാണ് യൂത്ത് കോൺഗ്രസ് സ്വീകരിക്കുന്നതെന്ന് ജയരാജൻ വിമർശിച്ചു. പദ്ധതികൾക്കെതിരായ പിഴുതെറിയൽ സംസ്കാരം നാടിന്റെ പുരോഗതിക്ക് തടസ്സമാണ്. എന്നാൽ, നാടിന്റെ വികസനത്തിന് ഗുണകരമായ ഏത് പദ്ധതിയെയും സി.പി.എം ഇരുകയ്യും നീട്ടി സ്വീകരിക്കുമെന്നും അദ്ദേഹം കൂട്ടിച്ചേർത്തു. നേരത്തെ സി.പി.എം സംസ്ഥാന സെക്രട്ടറി എം.വി. ഗോവിന്ദനും അതിവേഗ പാതയ്ക്കായുള്ള പുതിയ നീക്കങ്ങളെ സ്വാഗതം ചെയ്തുകൊണ്ട് രംഗത്തെത്തിയിരുന്നു.
