നിയമസഭയിൽ അവതരിപ്പിച്ച മദ്യനികുതിയിളവുമായി ബന്ധപ്പെട്ട ബില്ല് മുഖ്യമന്ത്രി സഭയിൽ നൽകിയ ഉറപ്പിന് പൂർണ്ണമായും എതിരാണെന്ന് കെ. എൻ. ബാലഗോപാൽ. ആവശ്യമായ ചർച്ചകൾക്ക് ശേഷം മാത്രമേ ഇത് നടപ്പിലാക്കൂ എന്ന് മുഖ്യമന്ത്രി പറഞ്ഞിരുന്ന കാര്യങ്ങൾ ഒട്ടും വിശ്വാസ്യതയിലെടുക്കാതെയാണ് ഇപ്പോൾ ബില്ല് കൊണ്ടുവന്നിരിക്കുന്നതെന്ന് അദ്ദേഹം കുറ്റപ്പെടുത്തി.
ഈ നീക്കം നിയമസഭയുടെ വൻ അവകാശലംഘനമാണെന്ന് ചൂണ്ടിക്കാട്ടി സഭയിൽ കെ. എൻ. ബാലഗോപാൽ ക്രമപ്രശ്നം ഉന്നയിച്ചെങ്കിലും സ്പീക്കർ അത് തള്ളുകയായിരുന്നു. കഴിഞ്ഞ മൂന്ന് വർഷമായി നികുതി വകുപ്പ് അനുമതി നൽകാതിരുന്ന ഒന്നാണിതെന്നും, മുൻപ് എൽ.ഡി.എഫ് സർക്കാർ ഇത് നടപ്പിലാക്കേണ്ട എന്ന് തീരുമാനിച്ചതുകൊണ്ടാണ് മുന്നോട്ട് പോകാതിരുന്നതെന്നും അദ്ദേഹം വ്യക്തമാക്കി.
കൃത്യമായ നയം ചർച്ച ചെയ്യാതെ പെട്ടെന്ന് നികുതിയിളവ് നടപ്പിലാക്കുന്നത് വളരെ അപകടകരമാണെന്ന് അദ്ദേഹം മുന്നറിയിപ്പ് നൽകി. ധനകാര്യ ബില്ലുകൾ സബ്ജക്ട് കമ്മിറ്റിക്ക് വിടാതെ പാസാക്കുന്ന രീതിയെ ചോദ്യം ചെയ്ത അദ്ദേഹം, ഏത് ഫിനാൻസ് ബില്ലാണ് ഇതുവരെ സബ്ജക്ട് കമ്മിറ്റിക്ക് വിടാതെ ഇത്തരത്തിൽ കൈകാര്യം ചെയ്തിട്ടുള്ളതെന്നും ചോദിച്ചു.
ഈ ബില്ലിന് പിന്നിൽ വ്യക്തമായ വിലപേശലുകൾ നടന്നിട്ടുണ്ടെന്നും കെ. എൻ. ബാലഗോപാൽ സഭയിൽ കടുത്ത ആരോപണമുന്നയിച്ചു. വിഷയത്തെച്ചൊല്ലി സഭയിൽ ഭരണ-പ്രതിപക്ഷ അംഗങ്ങൾ തമ്മിൽ ശക്തമായ വാദപ്രതിവാദങ്ങളാണ് നടന്നത്.
