സ്ത്രീകൾ പൊതുരംഗത്ത് സജീവമാകുന്നത് വലിയ നാശത്തിന് കാരണമാകുമെന്ന കാന്തപുരം എ.പി. അബൂബക്കർ മുസ്ലിയാരുടെ പ്രസ്താവനയ്ക്കെതിരെ സിപിഎം നേതാവ് പി. ജയരാജൻ. വിദ്യാഭ്യാസ സ്ഥാപനങ്ങളുടെ വേദികളിൽ സ്ത്രീകൾക്ക് പഠിക്കാനും മുന്നേറാനും ആത്മവിശ്വാസത്തോടെ പ്രത്യക്ഷപ്പെടാനും കഴിയുമ്പോൾ, പൊതുവേദികളിലെ അവരുടെ സാന്നിധ്യത്തെ എങ്ങനെ എതിർക്കാനാകുമെന്ന് അദ്ദേഹം ഫേസ്ബുക്ക് കുറിപ്പിലൂടെ ചോദിച്ചു.
സ്ത്രീകളുടെ സ്വാതന്ത്ര്യവും തുല്യതയും പൊതുജീവിതത്തിലെ പങ്കാളിത്തവും സംരക്ഷിക്കേണ്ടത് ജനാധിപത്യ സമൂഹത്തിന്റെ അടിസ്ഥാന ഉത്തരവാദിത്തമാണെന്ന് പി. ജയരാജൻ വ്യക്തമാക്കി. കാലത്തിന്റെ യാഥാർഥ്യങ്ങളുമായി പൊരുത്തപ്പെടാത്ത നിയന്ത്രണങ്ങൾ മുന്നോട്ടുവയ്ക്കുമ്പോൾ, സ്വന്തം സ്ഥാപനങ്ങളിൽ സ്വീകരിക്കുന്ന നിലപാടുകളും പൊതുവേദികളിലെ പ്രസ്താവനകളും തമ്മിലുള്ള വൈരുദ്ധ്യം ശ്രദ്ധിക്കപ്പെടേണ്ടതുണ്ടെന്നും അദ്ദേഹം ചൂണ്ടിക്കാട്ടി.
പൊതുവേദികളിലെ സ്ത്രീസാന്നിധ്യത്തെ ചോദ്യം ചെയ്ത കാന്തപുരം എ.പി. അബൂബക്കർ മുസ്ലിയാരുടെ പ്രസ്താവനയ്ക്കെതിരെ ജനാധിപത്യ മഹിളാ അസോസിയേഷൻ നേതാക്കൾ ഉയർത്തിയ പ്രതിഷേധത്തെയും അദ്ദേഹം പിന്തുണച്ചു. മതവിശ്വാസികൾക്ക് അവരുടെ വിശ്വാസങ്ങളെക്കുറിച്ച് അഭിപ്രായം പറയാനുള്ള അവകാശമുണ്ടെങ്കിലും, സ്ത്രീകൾ എങ്ങനെ ജീവിക്കണം, എവിടെ പ്രത്യക്ഷപ്പെടണം, എന്ത് ചെയ്യണം തുടങ്ങിയ കാര്യങ്ങളിൽ സമൂഹത്തിന് മാനദണ്ഡങ്ങൾ നിർദേശിക്കുമ്പോൾ അത് വിമർശനത്തിനും ചർച്ചകൾക്കും വിധേയമാകുന്നത് സ്വാഭാവികമാണെന്നും അദ്ദേഹം പറഞ്ഞു.
കാന്തപുരം മുസ്ലിയാർ നേതൃത്വം നൽകുന്ന മർകസിന്റെ കീഴിലുള്ള വിദേശ വിദ്യാഭ്യാസ സ്ഥാപനമായ ഫുസ്താത്തിന്റെ പ്രചാരണ വീഡിയോകളിലും സാമൂഹിക മാധ്യമ ഉള്ളടക്കങ്ങളിലും പെൺകുട്ടികളുടെ വിദ്യാഭ്യാസത്തിനും മുന്നേറ്റത്തിനും നൽകുന്ന പ്രാധാന്യം വ്യക്തമായി കാണാനാകുന്നുവെന്ന് പി. ജയരാജൻ ചൂണ്ടിക്കാട്ടി. ഡോ. ബിസ്ന ബദേരി ഉൾപ്പെടെയുള്ള വനിതകൾ ആത്മവിശ്വാസത്തോടെ പ്രത്യക്ഷപ്പെടുന്ന ദൃശ്യങ്ങൾ അതിന് ഉദാഹരണമാണെന്നും അദ്ദേഹം പറഞ്ഞു.
വിദ്യാഭ്യാസത്തിന്റെയും അറിവിന്റെയും മേഖലയിൽ സ്ത്രീകളുടെ മുന്നേറ്റം അംഗീകരിക്കുകയും പ്രോത്സാഹിപ്പിക്കുകയും ചെയ്യുന്ന സമീപനം സ്വീകരിക്കുമ്പോൾ, പൊതുസമൂഹത്തിലെ അവരുടെ സാന്നിധ്യത്തെ എതിർക്കുന്നതിലെ വൈരുദ്ധ്യമാണ് താൻ ചൂണ്ടിക്കാണിക്കുന്നതെന്നും അദ്ദേഹം വ്യക്തമാക്കി.
മതവിശ്വാസങ്ങളെ സംരക്ഷിക്കാനുള്ള അവകാശം എല്ലാവർക്കുമുണ്ടെങ്കിലും, സ്ത്രീകളുടെ തുല്യാവകാശങ്ങളും പൊതുജീവിതത്തിൽ പങ്കാളികളാകാനുള്ള സ്വാതന്ത്ര്യവും സംരക്ഷിക്കപ്പെടണമെന്നും അദ്ദേഹം അഭിപ്രായപ്പെട്ടു. സ്ത്രീകളെ രണ്ടാംതരക്കാരായി കാണുകയും പൊതുജീവിതത്തിൽ നിന്ന് അകറ്റിനിർത്താൻ ശ്രമിക്കുകയും ചെയ്യുന്ന സമീപനങ്ങൾക്കെതിരെ ജനാധിപത്യ മഹിളാ അസോസിയേഷൻ ഉൾപ്പെടെയുള്ള സംഘടനകൾ സ്ഥിരമായി നിലപാട് സ്വീകരിച്ചിട്ടുണ്ടെന്നും അദ്ദേഹം ഓർമ്മിപ്പിച്ചു.
ഈ വിഷയത്തെ മതവിരുദ്ധ നിലപാടായി ചിത്രീകരിക്കേണ്ടതില്ലെന്നും, മതങ്ങൾക്ക് അവരുടെ വിശ്വാസങ്ങൾ പ്രചരിപ്പിക്കാനുള്ള സ്വാതന്ത്ര്യം ഉള്ളതുപോലെ സ്ത്രീകൾക്കും അവരുടെ അവകാശങ്ങൾക്കായി സംസാരിക്കാനും സമൂഹത്തിൽ തുല്യമായി ഇടപെടാനുമുള്ള അവകാശമുണ്ടെന്നും പി. ജയരാജൻ പറഞ്ഞു.
സ്ത്രീകളെ പൊതുസമൂഹത്തിൽ നിന്ന് മാറ്റിനിർത്തുന്നതല്ല, മറിച്ച് അവർക്ക് തുല്യമായ ഇടവും അവസരവും അവകാശവും ഉറപ്പാക്കുന്നതാണ് ജനാധിപത്യ സമൂഹത്തിന്റെ ശരിയായ വഴിയെന്നും അദ്ദേഹം കൂട്ടിച്ചേർത്തു.
