കേരളത്തിലെ എൽഡിഎഫ് സർക്കാർ നടപ്പാക്കിയ ജനകീയ പദ്ധതികൾ താറുമാറാക്കുന്ന നിലപാടാണ് യുഡിഎഫ് സർക്കാർ സ്വീകരിക്കുന്നതെന്ന് രൂക്ഷ വിമർശനവുമായി എം.ബി. രാജേഷ്. കുടുംബശ്രീ ജനകീയ ഹോട്ടലുകൾ ഉൾപ്പെടെയുള്ള പദ്ധതികൾ യുഡിഎഫ് സർക്കാർ അടച്ചുപൂട്ടുകയാണെന്നും അദ്ദേഹം ആരോപിച്ചു.
മിതമായ നിരക്കിൽ ജനങ്ങൾക്ക് ഭക്ഷണം ലഭ്യമാക്കുന്നതിനായി എൽഡിഎഫ് സർക്കാർ ആവിഷ്കരിച്ച പദ്ധതിയാണ് കുടുംബശ്രീ ജനകീയ ഹോട്ടലുകളെന്ന് എം.ബി. രാജേഷ് പറഞ്ഞു. പദ്ധതിക്ക് സപ്ലൈകോ വഴി മിതമായ നിരക്കിൽ ഭക്ഷ്യസാധനങ്ങൾ ലഭ്യമാക്കിയിരുന്നു. എന്നാൽ യുഡിഎഫ് സർക്കാർ സപ്ലൈകോ വഴിയുള്ള ഈ സംവിധാനം പൂർണമായി നിർത്തലാക്കിയെന്നും അദ്ദേഹം ആരോപിച്ചു.
സപ്ലൈകോ വഴിയുള്ള സബ്സിഡി അരിയും സർക്കാർ നിർത്തലാക്കിയതായി എം.ബി. രാജേഷ് പറഞ്ഞു. ഇതോടെ ആയിരക്കണക്കിന് കുടുംബങ്ങളുടെ വരുമാനമാണ് ഇല്ലാതാകുന്നതെന്നും അദ്ദേഹം ആരോപിച്ചു. സ്ത്രീ സുരക്ഷാ പെൻഷനും നിർത്തലാക്കിയെന്നും ഇത് സർക്കാരിന്റെ സ്ത്രീവിരുദ്ധ നിലപാടിന്റെ ഭാഗമാണെന്നും എം.ബി. രാജേഷ് വിമർശിച്ചു.
തദ്ദേശവകുപ്പിലെ സ്ഥലംമാറ്റ നടപടികളിലും അദ്ദേഹം സർക്കാരിനെതിരെ ആരോപണം ഉന്നയിച്ചു. ഒരു രാത്രികൊണ്ട് 400 പേരെ സ്ഥലംമാറ്റിയെന്നും ഇക്കാര്യങ്ങൾ മാധ്യമങ്ങൾ കാണുന്നില്ലേയെന്നും എം.ബി. രാജേഷ് ചോദിച്ചു. ‘പെയ്മെന്റ് ട്രാൻസ്ഫർ’ ആണ് നടക്കുന്നതെന്നാണ് സർക്കാരിന്റെ വാദമെന്നും അദ്ദേഹം പറഞ്ഞു.
എൽഡിഎഫ് സർക്കാർ ഓൺലൈൻ ട്രാൻസ്ഫർ സംവിധാനം വഴിയാണ് സ്ഥലംമാറ്റം നടപ്പാക്കിയിരുന്നതെന്നും എം.ബി. രാജേഷ് വ്യക്തമാക്കി. പുതിയ സർക്കാർ അധികാരത്തിലെത്തിയതിന് പിന്നാലെ ജനകീയ പദ്ധതികൾ തകർക്കുകയും തദ്ദേശവകുപ്പിൽ അനധികൃത സ്ഥലംമാറ്റം നടത്തുകയും ചെയ്യുകയാണെന്ന വിമർശനവും അദ്ദേഹം ഉന്നയിച്ചു.
