നിയമസഭാ തെരഞ്ഞെടുപ്പിലെ പ്രചാരണത്തിന് നേതൃത്വം നൽകുന്നത് മുഖ്യമന്ത്രി പിണറായി വിജയൻ തന്നെയായിരിക്കുമെന്ന് സിപിഐഎം അഖിലേന്ത്യ ജനറൽ സെക്രട്ടറി എം.എ. ബേബി വ്യക്തമാക്കി. ടീമിന്റെ നേതാവും പിണറായി വിജയൻ തന്നെയാണെന്നും, തെരഞ്ഞെടുപ്പിൽ വിജയം നേടിയാൽ ഏത് തരത്തിലുള്ള ഭരണനേതൃത്വമാണ് വേണ്ടതെന്ന് അപ്പോൾ ആലോചിച്ച് തീരുമാനിക്കുമെന്നും അദ്ദേഹം പറഞ്ഞു. ഇക്കാര്യത്തിൽ പാർട്ടി ഇതുവരെ ഔദ്യോഗിക തീരുമാനം എടുത്തിട്ടില്ലെന്നും ബേബി വ്യക്തമാക്കി. ദിനപത്രത്തിന് നൽകിയ അഭിമുഖത്തിലാണ് അദ്ദേഹത്തിന്റെ പ്രതികരണം.

യുഡിഎഫിന്റെ രാഷ്ട്രീയ നീക്കങ്ങൾ പൂർണമായി പാളിപ്പോയതായും, പ്രതിപക്ഷ നേതാവ് വി.ഡി. സതീശൻ ഉന്നയിച്ച അവകാശവാദങ്ങൾ ജോസ് കെ. മാണിയുടെ പ്രസ്താവനയോടെ അവസാനിച്ചതായും എം.എ. ബേബി പറഞ്ഞു. തെരഞ്ഞെടുപ്പ് തന്ത്രജ്ഞരുടെ ഉപദേശപ്രകാരം രാഷ്ട്രീയത്തെ യുഡിഎഫ് പരിഹാസരൂപത്തിലേക്ക് മാറ്റുകയാണെന്നും, കേരള കോൺഗ്രസ് എം മുന്നണി മാറുമെന്ന പ്രചരണം വെറും പൊള്ളയായ വിസ്മയമായി മാറിയെന്നും അദ്ദേഹം പരിഹസിച്ചു.

അതേസമയം, ശബരിമല സ്വർണക്കൊള്ള കേസിൽ അറസ്റ്റിലായ എ. പത്മകുമാറിനെതിരെ കുറ്റം തെളിയിക്കപ്പെട്ടാൽ കർശന നടപടിയുണ്ടാകുമെന്ന് എം.എ. ബേബി വ്യക്തമാക്കി. കേസിൽ കുറ്റപത്രം സമർപ്പിക്കുന്നതോടെ പാർട്ടിയുടെ ഭാഗത്തുനിന്ന് ഉചിതമായ തീരുമാനമെടുക്കുമെന്നും, ഈ വിഷയത്തിൽ സിപിഐഎമ്മിന് യാതൊരു ആശയക്കുഴപ്പവുമില്ലെന്നും അദ്ദേഹം കൂട്ടിച്ചേർത്തു.