മദ്യനികുതി ഇളവ് സംബന്ധിച്ച വിവാദത്തിൽ യുഡിഎഫ് സർക്കാരിനും മുഖ്യമന്ത്രി വി.ഡി. സതീശനും എതിരെ രൂക്ഷ വിമർശനവുമായി പ്രതിപക്ഷ നേതാവ് പിണറായി വിജയൻ. ബജറ്റിൽ പ്രഖ്യാപിച്ച നികുതി ഇളവ് ഫിനാൻസ് ബില്ലിലൂടെ നിയമമാക്കിയാൽ പിന്നീട് അത് നടപ്പാക്കുന്നത് തടയാൻ യുഡിഎഫിന് നിയമപരമായി സാധിക്കില്ലെന്ന് അദ്ദേഹം പറഞ്ഞു.

ഫിനാൻസ് ബിൽ നിയമസഭ പാസാക്കിയാൽ നികുതി ഇളവ് നിയമത്തിന്റെ ഭാഗമാകുമെന്നും, അതിനെ എക്സിക്യൂട്ടീവ് ഉത്തരവിലൂടെ മരവിപ്പിക്കാനോ ഒഴിവാക്കാനോ കഴിയില്ലെന്നും പിണറായി വിജയൻ ചൂണ്ടിക്കാട്ടി. അത്തരമൊരു സാഹചര്യത്തിൽ ബിൽ സഭയിൽ അവതരിപ്പിച്ച ശേഷമുള്ള യുഡിഎഫ് ചർച്ചകൾക്ക് യാതൊരു പ്രസക്തിയുമില്ലെന്നും അദ്ദേഹം വിമർശിച്ചു.

മദ്യക്കമ്പനികളുടെ ആവശ്യങ്ങൾ അംഗീകരിക്കാനുള്ള നീക്കമാണ് ഇതിന് പിന്നിലെന്നും ബജറ്റ് അവതരിപ്പിച്ചതു മുതൽ അതിലെ നിർദേശങ്ങളെ ന്യായീകരിച്ച സർക്കാർ, മദ്യനികുതി ഇളവിന്റെ കാര്യത്തിൽ മാത്രം കൂട്ടായ തീരുമാനം ഉണ്ടായിട്ടില്ലെന്ന വാദം ഉയർത്തുന്നത് ദുരൂഹമാണെന്നും അദ്ദേഹം പറഞ്ഞു.

പ്രതിപക്ഷ കക്ഷികൾ, മാധ്യമങ്ങൾ, മത-സാമുദായിക സംഘടനകൾ എന്നിവ ഉയർത്തിയ ശക്തമായ വിമർശനങ്ങളോടൊപ്പം കോൺഗ്രസിനകത്തും ഘടകകക്ഷികൾക്കിടയിലും എതിർപ്പുകൾ ഉയർന്നത് നികുതി ഇളവ് കൂട്ടായ തീരുമാനമല്ലെന്നതിന് തെളിവാണെന്നും പിണറായി വിജയൻ അഭിപ്രായപ്പെട്ടു.

എക്സൈസ് നയത്തിലെ മാറ്റത്തെക്കുറിച്ച് എക്സൈസ് മന്ത്രിക്കുപോലും വ്യക്തതയില്ലെന്ന നിലപാടാണ് പുറത്തുവന്നതെന്നും, ധനകാര്യ വകുപ്പ് കൈകാര്യം ചെയ്യുന്ന മുഖ്യമന്ത്രി ഏകപക്ഷീയമായി തീരുമാനങ്ങൾ അടിച്ചേൽപ്പിക്കുകയാണെന്ന അതൃപ്തി ഭരണപക്ഷത്തിനകത്തും ഉയരുന്നതായും അദ്ദേഹം ആരോപിച്ചു.

മദ്യത്തിന് നികുതി ഇളവ് നൽകാനുള്ള തീരുമാനം സർക്കാർ പുനഃപരിശോധിക്കണമെന്നും ജനവിരുദ്ധവും വിവാദപരവുമായ നടപടികളിൽ നിന്ന് പിൻമാറണമെന്നും പിണറായി വിജയൻ ആവശ്യപ്പെട്ടു.