യു.പിയിലെ അയോധ്യയിൽ രാമക്ഷേത്രത്തിന്‍റെ പേരിൽ കോടികളുടെ ഭൂമി തട്ടിപ്പ്​ ആരോപിച്ച്​ പ്രതിപക്ഷ പാർട്ടികൾ. കേന്ദ്ര സർക്കാർ കഴിഞ്ഞ വർഷം സ്ഥാപിച്ച രാമ ക്ഷേത്ര ട്രസ്റ്റാണ്​ തട്ടിപ്പിന്​ ​പിന്നിലെന്ന്​ സമാജ്​വാദി പാർട്ടിയും ആം ആദ്​മി പാർട്ടിയും ആരോപിച്ചു. കഴിഞ്ഞ മാർച്ച്​ 18ന്​ ഒരു വ്യക്​തിയിൽനിന്ന്​ 1.208 ഹെക്​ടർ ഭൂമി രണ്ടു കോടി രൂപക്ക്​ രണ്ട്​ റിയൽ എസ്​റ്റേറ്റ്​ ഏജന്‍റുമാർ വാങ്ങുന്നു. മിനിറ്റുകൾ ശേഷം 18.5 കോടി രൂപക്ക് ​ രാമജന്മഭൂമി തീർഥ ക്ഷേത്ര ട്രസ്റ്റിന്​ അതേ സ്ഥലം വിൽക്കുന്നു.

കേവലം 10 മിനിറ്റിൽ താഴെ സമയവ്യത്യാസത്തിൽ ഭൂമിയുടെ വില എങ്ങനെയാണ്​ അനേക ഇരട്ടികളായി വർദ്ധിച്ചതെന്ന്​ വിശദീകരിക്കണമെന്ന്​ മുൻ മന്ത്രിയും സമാജ്​വാദി പാർട്ടി നേതാവുമായ പവൻ പാണ്ഡെ ആവശ്യപ്പെട്ടു. സംഭവത്തിൽ സി.ബി.ഐ അന്വേഷണം നടത്തണമെന്നും പാണ്ഡെ കൂട്ടിച്ചേർത്തു.

ബാബ ഹരിദാസ്​ എന്നയാളുടെ ഭൂമിയാണ്​ രവി മോഹൻ തിവാരി, സുൽത്താൻ അൻസാരി എന്നിവർക്ക്​ വിൽപന നടത്തിയത്​. ഇവരിൽനിന്നാണ്​ ട്രസ്റ്റ്​ ഭൂമി ഏറ്റെടുത്തത്​. രണ്ട്​ ഇടപാടുകളിലും അയോദ്ധ്യ മേയർ ഋഷികേഷ്​ ഉപാധ്യായയും രാമ ജന്മഭൂമി തീർഥ ക്ഷേത്ര ട്രസ്റ്റി അനിൽ മിശ്രയുമാണ്​ സാക്ഷികൾ. ഇടപാട്​ നടന്നയുടൻ 17 കോടി ബാങ്ക്​ വഴി കൈമാറുകയും ചെയ്​തു.

മിനിറ്റുകൾക്കിടെ ഭൂമിയിൽ എന്ത്​ സ്വർണഖനിയാണ്​ കണ്ടെടുത്തതെന്നും പണം ആര്​ കൈപ്പറ്റിയെന്നും അന്വേഷിക്കണമെന്നും പവൻ പാണ്ഡെ ആവശ്യപ്പെട്ടു. ക്ഷേത്രത്തിനായി നീക്കിവെച്ച ഭൂമിയോടു ചേർന്നുള്ള ഭൂമിയിലാണ്​ ഇടപാട്​ നടന്നത്​.