മുഖ്യമന്ത്രി പിണറായി വിജയനും കെ.പി.സി.സി പ്രസിഡൻറ്​ ​കെ.സുധാകരനും തമ്മിൽ ബ്രണ്ണൻ കോളജ്​ പഠനകാലത്ത്​ നടന്നുവെന്ന്​ പറയുന്ന സംഘട്ടനത്തെക്കുറിച്ച്​ തനിക്കൊന്നുമറിയില്ലെന്ന്​ കോൺഗ്രസ്​ നേതാവ്​ ​മമ്പറം ദിവാകരൻ. 1971ൽ ഞാനും സുധാകരനും ഒന്നിച്ച്​ ​ബ്രണ്ണനിൽ പഠിച്ചതാണ്​. ഞങ്ങളുടെ സീനിയർ ആയിരുന്നു പിണറായി വിജയൻ. അന്ന്​ കോൺഗ്രസിൽ രണ്ടു വിഭാഗങ്ങളുണ്ടായിരുന്നു. ഇന്ദിരാ കോൺഗ്രസിനൊപ്പമായിരുന്നു ഞാൻ. സംഘടനാ കോൺ​ഗ്രസിലായിരുന്ന കെ. സുധാകരൻ അന്ന്​ കെ.എസ്​.യു വിരുദ്ധനായിരുന്നു​.

​പിണറായി വിജയൻ ബ്രണ്ണൻ കോളജിൽ വന്നപ്പോൾ ചവിട്ടിവീഴ്​ത്തിയെന്ന്​ കെ. സുധാകരൻ പറയുന്ന സംഭവത്തെക്കുറിച്ച്​ ബ്രണ്ണനിലെ പഠനകാലത്ത്​ ആരും പറഞ്ഞുകേട്ടിട്ടില്ല. അന്ന്​ ഞങ്ങളും ഇടതുപക്ഷവും തമ്മിൽ നിരവധി സംഘട്ടനം ഉണ്ടായിട്ടുണ്ട്​. മുൻമന്ത്രി എ.കെ. ബാലനായിരുന്നു അന്ന്​ ഇടതുവിദ്യാർഥി സംഘടനയുടെ നേതാവ്​. പിണറായി വിജയൻ്റെ മക്കളെ തട്ടിക്കൊണ്ടു പോകാൻ കെ സുധാകരൻ ശ്രമിച്ചുവെന്ന ആരോപണവും മുമ്പ് കേട്ടിട്ടില്ലെന്ന് അദ്ദേഹം പറഞ്ഞു.

കെ.പി.സി.സി അധ്യക്ഷനായ കെ. സുധാകരൻ പക്വത കാണിക്കണമെന്ന് മമ്പറം ദിവാകരൻ പറ‍ഞ്ഞു. മുഖ്യമന്ത്രിക്കെതിരെ ക്യാമ്പസ് കഥകളല്ല പറയേണ്ടത്. ഈ രാഷ്ട്രീയം കോൺഗ്രസിന് ഗുണം ചെയ്യില്ല. ഇന്നത്തെ രാഷ്ട്രീയവുമായി ബന്ധപ്പെട്ട കാര്യങ്ങളാണ് കെ.പി.സി.സി അധ്യക്ഷന്‍ പറയേണ്ടത്. സുധാകരനെ അധ്യക്ഷനാക്കും മുൻപേ ആശങ്ക നേതൃത്വത്തെ അറിയിച്ചിരുന്നെന്നും അദ്ദേഹം കൂട്ടിച്ചേര്‍ത്തു.