സിപിഎം സ്ഥാനാർഥികൾക്ക് നാമനിർദേശ പത്രിക സമർപ്പിക്കാൻ സുരക്ഷ ഉറപ്പാക്കണം; ത്രിപുര ഡിജിപിക്ക് ഹൈക്കോടതി നിർദേശം

മുനിസിപ്പൽ തെരഞ്ഞെടുപ്പിൽ സിപിഎം പിന്തുണയ്ക്കുന്ന സ്ഥാനാർഥികൾക്ക് തടസ്സങ്ങളില്ലാതെ നാമനിർദേശ പത്രിക സമർപ്പിക്കാൻ മതിയായ സുരക്ഷ ഒരുക്കണമെന്ന് ത്രിപുര ഡിജിപിക്ക് ഹൈക്കോടതി നിർദേശം. തെരഞ്ഞെടുപ്പിൽ മത്സരിക്കുക സ്ഥാനാർഥികളുടെ ജനാധിപത്യ അവകാശമാണെന്ന് നിരീക്ഷിച്ച കോടതി, നാമനിർദേശ പത്രിക സമർപ്പിക്കാനുള്ള അവസാന തീയതിയുടെ അടിയന്തര സാഹചര്യം പരിഗണിച്ചാണ് ഉത്തരവ് പുറപ്പെടുവിച്ചത്.

ജിരാനിയ, റാണിർബസാർ, മോഹൻപൂർ, ശാന്തിർബസാർ, കമൽപൂർ എന്നീ അഞ്ച് സബ് ഡിവിഷനുകളിൽ സിപിഎം സ്ഥാനാർഥികൾക്ക് നാമനിർദേശ പത്രിക സമർപ്പിക്കാൻ തടസ്സം സൃഷ്ടിക്കുന്ന തരത്തിൽ സാമൂഹികവിരുദ്ധർ ഭീഷണിയും അക്രമാന്തരീക്ഷവും സൃഷ്ടിക്കുന്നുവെന്ന് ചൂണ്ടിക്കാട്ടിയാണ് സിപിഎം ത്രിപുര സംസ്ഥാന കമ്മിറ്റി ഹൈക്കോടതിയെ സമീപിച്ചത്. ഏഴ് സ്ഥാനാർഥികളും ഹർജിയിൽ പങ്കുചേർന്നിരുന്നു.

സംഭവങ്ങളുമായി ബന്ധപ്പെട്ട് വിവിധ പൊലീസ് സ്റ്റേഷനുകളിൽ എഫ്‌ഐആറുകൾ രജിസ്റ്റർ ചെയ്തിട്ടുണ്ടെന്നും സ്ഥാനാർഥികൾക്ക് പൊലീസ് സംരക്ഷണം വേണമെന്നും ഹർജിക്കാർ ആവശ്യപ്പെട്ടു. 2026 നവംബർ ആറായിരുന്നു നാമനിർദേശ പത്രിക സമർപ്പിക്കാനുള്ള അവസാന തീയതി.

ജസ്റ്റിസ് എസ്. ദത്ത പുരകായസ്ഥ അധ്യക്ഷനായ ബെഞ്ചാണ് ഹർജി പരിഗണിച്ചത്. സ്ഥാനാർഥികൾക്ക് തെരഞ്ഞെടുപ്പിൽ മത്സരിക്കാനുള്ള ജനാധിപത്യ അവകാശമുണ്ടെന്നും സിപിഎം പിന്തുണയ്ക്കുന്ന സ്ഥാനാർഥികൾക്ക് അന്നുതന്നെ തടസ്സങ്ങളില്ലാതെ നാമനിർദേശ പത്രിക സമർപ്പിക്കാൻ ആവശ്യമായ സുരക്ഷ ഉറപ്പാക്കണമെന്നും കോടതി നിർദേശിച്ചു.

അതേസമയം, ഹർജിയിലെ ആരോപണങ്ങളുടെ മെറിറ്റിനെക്കുറിച്ച് യാതൊരു അഭിപ്രായവും പ്രകടിപ്പിക്കാതെയാണ് സുരക്ഷാ ക്രമീകരണങ്ങൾ ഒരുക്കാനുള്ള നിർദേശം നൽകിയതെന്നും ഹൈക്കോടതി വ്യക്തമാക്കി.