നവംബർ 3 മുതൽ സ്വകാര്യ ബസുകൾ സർവീസ് നിർത്തും; പ്രിയദർശിനി സർവീസിലെ നഷ്ടത്തിൽ സർക്കാരിനെതിരെ പ്രതിഷേധം

കെഎസ്ആർടിസിയുടെ പ്രിയദർശിനി സർവീസ് മൂലമുണ്ടായ നഷ്ടത്തിന് സർക്കാർ പരിഹാരം കാണാത്തതിൽ പ്രതിഷേധിച്ച് നവംബർ 3 മുതൽ സംസ്ഥാനത്ത് സ്വകാര്യ ബസുകൾ സർവീസ് നിർത്തും. പാലക്കാട് ചേർന്ന സംയുക്ത സ്വകാര്യ ബസ് ഉടമകളുടെ യോഗത്തിലാണ് സമരപ്രഖ്യാപനം. ഒക്ടോബർ 10ന് ഗതാഗത മന്ത്രിയുമായി നടത്തിയ ചർച്ചയിൽ അനുകൂല തീരുമാനമുണ്ടാകാത്തതാണ് സമരത്തിലേക്ക് നീങ്ങാൻ കാരണമെന്ന് ബസ് ഉടമകൾ അറിയിച്ചു.

സ്വകാര്യ ബസ് മേഖലയിലെ നഷ്ടം പരിഹരിക്കുന്നതിനായി സെപ്റ്റംബർ 2ന് സർക്കാർ നിയോഗിച്ച പ്രത്യേക കമ്മീഷൻ നിർദേശങ്ങൾ സമർപ്പിച്ചിരുന്നെങ്കിലും അവ നടപ്പാക്കാൻ സർക്കാർ തയ്യാറാകുന്നില്ലെന്നാണ് ബസ് ഉടമകളുടെ ആരോപണം. യാത്രക്കാരെ ബുദ്ധിമുട്ടിക്കാതിരിക്കാൻ സമരം ഒഴിവാക്കാൻ ശ്രമിച്ചിട്ടും സർക്കാർ അനുകൂല നിലപാട് സ്വീകരിക്കുന്നില്ലെന്നും അവർ കുറ്റപ്പെടുത്തി.

ഗതാഗത വകുപ്പ് കെഎസ്ആർടിസിക്ക് വേണ്ടി മാത്രമായി പ്രവർത്തിക്കുകയാണെന്നും സ്വകാര്യ ബസ് മേഖലയിലെ പ്രശ്നങ്ങൾ പരിഹരിക്കാൻ സർക്കാർ തയ്യാറാകുന്നില്ലെന്നും ബസ് ഉടമകൾ ആരോപിച്ചു. നേരത്തേ പ്രശ്നങ്ങൾ പഠിച്ച് പരിഹാരം നിർദേശിക്കാൻ കമ്മീഷനെ നിയോഗിച്ചിട്ടും വീണ്ടും കമ്മീഷനെ നിയമിച്ച സർക്കാർ നടപടിയെ അംഗീകരിക്കില്ലെന്നും സംയുക്ത ബസ് ഉടമ സമിതി വ്യക്തമാക്കി.

പുതിയ കമ്മീഷനെ നിയോഗിക്കുന്നതിന് പകരം നിലവിലെ പ്രശ്നങ്ങൾക്ക് അടിയന്തര പരിഹാരം കാണണമെന്നാണ് ബസ് ഉടമകളുടെ ആവശ്യം. പ്രിയദർശിനി സർവീസ് ആരംഭിച്ചതോടെ നാലു മാസത്തിനിടെ 12 കോടി രൂപയുടെ നഷ്ടമുണ്ടായെന്നും 400 ബസുകൾ സർവീസ് പൂർണമായി നിർത്തിയെന്നും അവർ അവകാശപ്പെട്ടു. കൂടാതെ 3,000 ബസുകൾ സർവീസ് വെട്ടിക്കുറച്ചതായും ബസ് ഉടമകൾ വ്യക്തമാക്കി.