കേരള സർവകലാശാല ആസ്ഥാനത്ത് എസ്എഫ്ഐ വനിതാ പ്രവർത്തകർക്കുനേരെ നടന്ന പൊലീസ് അതിക്രമത്തെ ശക്തമായി വിമർശിച്ച് സിപിഎം സംസ്ഥാന സെക്രട്ടറി എം.വി. ഗോവിന്ദൻ മാസ്റ്റർ. വിദ്യാഭ്യാസ മേഖലയെ കാവിവൽക്കരിക്കാനാണ് യുഡിഎഫ് സർക്കാർ ശ്രമിക്കുന്നതെങ്കിൽ അതിനെതിരെ ശക്തമായ ജനകീയ പ്രതിഷേധം ഉയർന്നുവരുമെന്ന് അദ്ദേഹം പറഞ്ഞു.
തിരുവനന്തപുരം ജനറൽ ആശുപത്രിയിൽ ചികിത്സയിൽ കഴിയുന്ന എസ്എഫ്ഐ പ്രവർത്തകരെ സന്ദർശിച്ച ശേഷമാണ് എം.വി. ഗോവിന്ദൻ പ്രതികരിച്ചത്. ഇടത് യുവജന-വിദ്യാർഥി പ്രസ്ഥാനങ്ങളുടെ പ്രതിഷേധങ്ങളെ അടിച്ചമർത്താനും ചോരയിൽ മുക്കിക്കളയാനും കഴിയുമെന്നാണ് സർക്കാർ കരുതുന്നതെന്നും അദ്ദേഹം ആരോപിച്ചു.
യാതൊരു പ്രകോപനവുമില്ലാതെയാണ് പൊലീസ് വിദ്യാർഥികൾക്കെതിരെ മൃഗീയമായ ആക്രമണം നടത്തിയതെന്ന് അദ്ദേഹം പറഞ്ഞു. സമരത്തിലുണ്ടായിരുന്ന പ്രവർത്തകരെ നിഷ്ഠൂരമായി മർദിച്ചുവെന്നും രണ്ട് വനിതാ പ്രവർത്തകർ ഉൾപ്പെടെ നിരവധി പേർക്ക് പരിക്കേറ്റിട്ടുണ്ടെന്നും അദ്ദേഹം വ്യക്തമാക്കി.
മർദനത്തിൽ രണ്ട് വിദ്യാർഥികളുടെ തലയ്ക്ക് ഗുരുതര പരിക്കേറ്റിട്ടുണ്ടെന്നും പുരുഷ പൊലീസുകാരാണ് വനിതാ പ്രവർത്തകരെ തലയ്ക്കടിച്ച് വീഴ്ത്തിയതെന്നും എം.വി. ഗോവിന്ദൻ മാസ്റ്റർ ആരോപിച്ചു. പ്രതിഷേധം നടത്തുന്ന വിദ്യാർഥികൾക്കെതിരെ പൊലീസ് സ്വീകരിച്ച നടപടി ജനാധിപത്യ വിരുദ്ധമാണെന്നും സംഭവത്തിൽ ഉത്തരവാദികളായവർക്കെതിരെ നടപടി വേണമെന്നും അദ്ദേഹം ആവശ്യപ്പെട്ടു.
കേരള സർവകലാശാലയുമായി ബന്ധപ്പെട്ട വിഷയങ്ങളിൽ പ്രതിഷേധിച്ച വിദ്യാർഥികൾക്കെതിരായ പൊലീസ് നടപടി വ്യാപക പ്രതിഷേധത്തിന് ഇടയാക്കിയിരിക്കുകയാണ്. സംഭവത്തിൽ സർക്കാരും പൊലീസും നിലപാട് വ്യക്തമാക്കണമെന്ന ആവശ്യവും ശക്തമാകുന്നുണ്ട്.
