കേരളത്തിലെ കോൺഗ്രസ് സംഘടനയിൽ പുതിയ കെപിസിസി അധ്യക്ഷനെ നിയമിക്കുന്നതുമായി ബന്ധപ്പെട്ട പുനഃസംഘടനാ നടപടികൾ എഐസിസി താൽക്കാലികമായി മരവിപ്പിച്ചു. അധ്യക്ഷ സ്ഥാനത്തേക്ക് ആരെ പരിഗണിക്കണമെന്ന കാര്യത്തിൽ സംസ്ഥാന നേതൃത്വത്തിനിടയിൽ സമവായം രൂപപ്പെടാത്ത സാഹചര്യത്തിലാണ് ഹൈക്കമാൻഡിന്റെ നടപടി.
നിലവിലെ സംഘടനാ സംവിധാനം തന്നെ തുടരാനാണ് കേന്ദ്ര നേതൃത്വം നിർദേശം നൽകിയിരിക്കുന്നത്. ബെന്നി ബഹന്നാൻ, കൊടിക്കുന്നിൽ സുരേഷ്, അജയ് തറയിൽ, എം.കെ. രാഘവൻ, ആന്റോ ആന്റണി, അടൂർ പ്രകാശ്, വി.എസ്. ശിവകുമാർ, ടി.എൻ. പ്രതാപൻ എന്നിവരുടെ പേരുകളാണ് കെപിസിസി അധ്യക്ഷ സ്ഥാനത്തേക്ക് പ്രധാനമായും പരിഗണിച്ചിരുന്നത്.
എന്നാൽ പുതിയ അധ്യക്ഷനെ സംബന്ധിച്ച് സംസ്ഥാന നേതാക്കൾക്കിടയിൽ പൊതുസമ്മതം രൂപപ്പെടുത്താൻ കഴിഞ്ഞിട്ടില്ല. ഒരു നേതാവിന്റെ പേര് ഏകപക്ഷീയമായി അടിച്ചേൽപ്പിച്ചാൽ പാർട്ടിക്കുള്ളിലെ ഗ്രൂപ്പ് തർക്കങ്ങളും വിഭാഗീയതയും വീണ്ടും ശക്തമാകുമെന്ന ആശങ്കയാണ് എഐസിസിക്കുള്ളത്. ഇതാണ് പുനഃസംഘടനാ നടപടികൾ തൽക്കാലം നിർത്തിവയ്ക്കാൻ പ്രധാന കാരണമെന്നാണ് സൂചന.
മുഖ്യമന്ത്രി വി.ഡി. സതീശനും എഐസിസി ജനറൽ സെക്രട്ടറി കെ.സി. വേണുഗോപാലും ഉൾപ്പെടെയുള്ള മുതിർന്ന നേതാക്കൾ അധ്യക്ഷ സ്ഥാനത്തേക്ക് ഏതെങ്കിലും ഒരു നേതാവിന്റെ പേര് പരസ്യമായി പിന്തുണയ്ക്കാൻ തയ്യാറായിട്ടില്ല. പാർട്ടിയിലെ നിലവിലെ ഗ്രൂപ്പ് സമവാക്യങ്ങളെ ബാധിക്കാതിരിക്കാനുള്ള ജാഗ്രതയുടെ ഭാഗമായാണ് ഇരുവരും നിലപാട് വ്യക്തമാക്കാതെ തുടരുന്നത്.
അധ്യക്ഷ നിയമനത്തിൽ സമവായം കണ്ടെത്തിയ ശേഷം മാത്രമേ പുനഃസംഘടനാ നടപടികളുമായി മുന്നോട്ടുപോകൂ എന്ന നിലപാടിലാണ് ഹൈക്കമാൻഡ്. ഇതോടെ കെപിസിസി അധ്യക്ഷനെ ചൊല്ലിയുള്ള ചർച്ചകൾ കോൺഗ്രസിൽ വീണ്ടും സജീവമാകുകയാണ്.
