കൊച്ചി മേയർ സ്ഥാനത്തേക്ക് പരിഗണിക്കാത്തതിൽ കടുത്ത അമർഷവുമായി മുതിർന്ന കോൺഗ്രസ് നേതാവ് ദീപ്തി മേരി വർഗീസ് രംഗത്തെത്തി. മേയർ തിരഞ്ഞെടുപ്പിൽ കെപിസിസി നിശ്ചയിച്ച മാനദണ്ഡങ്ങൾ പൂർണ്ണമായും അട്ടിമറിക്കപ്പെട്ടെന്ന് ചൂണ്ടിക്കാട്ടി ദീപ്തി കെപിസിസി അധ്യക്ഷൻ സണ്ണി ജോസഫിന് ഔദ്യോഗികമായി പരാതി നൽകി.

തന്നെ പദവിയിൽ നിന്ന് ഒഴിവാക്കാൻ ബോധപൂർവ്വമായ ശ്രമം നടന്നതായും, കൗൺസിലർമാരുടെ അഭിപ്രായം ആരായുന്നതിൽ സുതാര്യത ഉണ്ടായില്ലെന്നും ദീപ്തി ആരോപിക്കുന്നു. വി.കെ മിനിമോളും ഷൈനി മാത്യുവും മേയർ സ്ഥാനം പങ്കിടുമെന്ന ഡിസിസി പ്രഖ്യാപനത്തിന് പിന്നാലെയാണ് കോൺഗ്രസിനുള്ളിലെ ആഭ്യന്തര കലഹം രൂക്ഷമായത്.

കെപിസിസി നിരീക്ഷകൻ എത്തി കൗൺസിലർമാരുടെ അഭിപ്രായം നേരിട്ട് കേൾക്കണമെന്ന സർക്കുലർ നിലനിൽക്കെ, ഗ്രൂപ്പ് നേതാക്കളായ ഡൊമിനിക് പ്രസന്റേഷനും എൻ. വേണുഗോപാലുമാണ് കാര്യങ്ങൾ തീരുമാനിച്ചതെന്ന് ദീപ്തി പരാതിയിൽ പറയുന്നു. രഹസ്യ വോട്ടെടുപ്പ് നടത്തിയില്ലെന്നും ഡിസിസി അധ്യക്ഷൻ മുഹമ്മദ് ഷിയാസ് അടക്കമുള്ളവർ തനിക്കെതിരെ പ്രവർത്തിച്ചതായും അവർ ആരോപിച്ചു. അതേസമയം, ആദ്യ രണ്ടര വർഷം വി.കെ മിനിമോളും ബാക്കി കാലാവധി ഷൈനി മാത്യുവും മേയർ സ്ഥാനം വഹിക്കാനാണ് നിലവിലെ തീരുമാനം.