പ്രതിപക്ഷ നേതാവ് വി.ഡി. സതീശന് വർഗീയ താൽപ്പര്യമുണ്ടെന്ന ആരോപണവുമായി തുഷാർ വെള്ളാപ്പള്ളി രംഗത്തെത്തി. ഒരു സമുദായത്തിന്റെ വോട്ട് ലക്ഷ്യമാക്കി മറ്റൊരു സമുദായത്തെ തള്ളിപ്പറയുകയാണ് സതീശൻ ചെയ്തതെന്നും, കാന്തപുരത്തിന്റെ വേദിയിൽ എസ്എൻഡിപി യോഗത്തെ അപകീർത്തിപ്പെടുത്തിയതായും തുഷാർ വെള്ളാപ്പള്ളി ആരോപിച്ചു. ഇത് മുഴുവൻ വർഗീയ ലക്ഷ്യത്തോടെയുള്ള നടപടിയാണെന്നും അദ്ദേഹം പറഞ്ഞു.
ഇതിനു മുൻപ് എസ്എൻഡിപി ജനറൽ സെക്രട്ടറി വെള്ളാപ്പള്ളി നടേശനും വി.ഡി. സതീശനെതിരെ വിമർശനവുമായി രംഗത്തെത്തിയിരുന്നു. മലപ്പുറത്തെക്കുറിച്ചുള്ള തന്റെ പരാമർശങ്ങൾ വളച്ചൊടിക്കപ്പെട്ടുവെന്നും, തന്നെ വർഗീയവാദിയായി ചിത്രീകരിക്കാനുള്ള ശ്രമമാണ് നടക്കുന്നതെന്നും വെള്ളാപ്പള്ളി ആരോപിച്ചു.
ഇതിൽ വ്യക്തത വരുത്തിയതാണെന്നും, വർഗീയവാദിയെന്ന് വിളിക്കുന്നത് വി.ഡി. സതീശനാണെന്നും അദ്ദേഹം പറഞ്ഞു. സതീശനെ ‘ഇന്നലെ പൂത്ത തകര’യെന്ന് വിശേഷിപ്പിച്ച വെള്ളാപ്പള്ളി, കാന്തപുരം തന്നെ സതീശനെതിരെ പ്രതികരിച്ചതായും വ്യക്തമാക്കി.
