കൊൽക്കത്തയിലെ സ്കൂളുകളിലെ ഉച്ചഭക്ഷണ പദ്ധതിയിൽ ഇസ്കോണിന്റെ സഹകരണം തേടാനുള്ള പശ്ചിമ ബംഗാൾ സർക്കാരിന്റെ തീരുമാനത്തെ ചോദ്യം ചെയ്ത് സിപിഐഎം രംഗത്ത്. സംസ്ഥാന ബജറ്റിൽ ധനമന്ത്രി സ്വപൻ ദാസ്ഗുപ്ത ഉച്ചഭക്ഷണ വിതരണത്തിന് ഇസ്കോണിന്റെ സഹായം സ്വീകരിക്കുമെന്ന് പ്രഖ്യാപിച്ചതിന് പിന്നാലെയാണ് ഇടതുപക്ഷത്തിന്റെ വിമർശനം.

ഉച്ചഭക്ഷണ പദ്ധതി രാജ്യവ്യാപകമായി നടപ്പാക്കുന്ന കേന്ദ്ര-സംസ്ഥാന സംയുക്ത പദ്ധതിയാണെന്നും, അത്തരമൊരു സർക്കാർ പദ്ധതിയുടെ നടത്തിപ്പിൽ മതസംഘടനയെ ഉൾപ്പെടുത്തേണ്ട സാഹചര്യം എന്താണെന്നും സിപിഐഎം ചോദിച്ചു. കൊൽക്കത്തയിലെ സ്കൂളുകളിലെ ഉച്ചഭക്ഷണ വിതരണത്തിന്റെ ഉത്തരവാദിത്തം ഇസ്കോണിന് നൽകുന്നതിന്റെ ആവശ്യകത സർക്കാർ വ്യക്തമാക്കണമെന്നാണ് പാർട്ടിയുടെ ആവശ്യം.

സാമ്പത്തിക ശാസ്ത്രജ്ഞയും അധ്യാപികയുമായ ഇഷിത മുഖർജി പ്രതികരിക്കവെ, ഉച്ചഭക്ഷണ പദ്ധതിക്കുള്ള വിഹിതം വർധിപ്പിച്ചതിനെ സ്വാഗതം ചെയ്തെങ്കിലും ഇസ്കോണിനെ പദ്ധതിയുമായി ബന്ധിപ്പിക്കുന്നതിന്റെ യുക്തി വ്യക്തമല്ലെന്ന് അഭിപ്രായപ്പെട്ടു. സർക്കാർ സംവിധാനത്തിലൂടെ വിജയകരമായി നടപ്പിലാക്കുന്ന പദ്ധതിയിൽ മതസംഘടനയുടെ പങ്ക് എന്താണെന്ന് അവർ ചോദിച്ചു.

അതേസമയം, ബജറ്റ് പ്രഖ്യാപനത്തിന് പിന്നാലെ ഇസ്കോൺ വൈസ് പ്രസിഡന്റും വക്താവുമായ രാധർമൻ ദത്ത സർക്കാരിന്റെ തീരുമാനത്തെ സ്വാഗതം ചെയ്തു. രാജ്യത്തെ വിവിധ സംസ്ഥാനങ്ങളിലെ സർക്കാർ സ്കൂളുകളിൽ ഇസ്കോണിന്റെ അന്നമൃത് ഫൗണ്ടേഷൻ പ്രതിദിനം പത്ത് ലക്ഷത്തിലധികം വിദ്യാർത്ഥികൾക്ക് പോഷകസമൃദ്ധമായ ഭക്ഷണം വിതരണം ചെയ്യുന്നുണ്ടെന്ന് അദ്ദേഹം പറഞ്ഞു. ഉയർന്ന ഗുണനിലവാര മാനദണ്ഡങ്ങൾ പാലിച്ചാണ് ഭക്ഷണം തയ്യാറാക്കുന്നതെന്നും വിദ്യാർത്ഥികൾക്ക് ആരോഗ്യകരമായ സസ്യാഹാര ഭക്ഷണമാണ് നൽകുന്നതെന്നും അദ്ദേഹം വ്യക്തമാക്കി.