പശ്ചിമഘട്ടത്തിലെ ജനവാസ മേഖലകളെ പരിസ്ഥിതി ലോല മേഖലകളുടെ (ഇഎസ്എ) പട്ടികയിൽ ഉൾപ്പെടുത്താനുള്ള നീക്കം പിൻവലിക്കണമെന്ന് ആവശ്യപ്പെട്ട് കേന്ദ്ര സർക്കാരിനെതിരെ രംഗത്തെത്തി സിപിഐ എം സംസ്ഥാന സെക്രട്ടേറിയറ്റ്. മലയോര മേഖലയിലെ ജനങ്ങളുടെ ആശങ്കകൾ പരിഗണിച്ച് ജനവാസ കേന്ദ്രങ്ങൾ, കൃഷിഭൂമികൾ, തോട്ടങ്ങൾ എന്നിവ ഇഎസ്എ പരിധിയിൽ നിന്ന് ഒഴിവാക്കണമെന്നാണ് പാർട്ടിയുടെ ആവശ്യം.

ഇടുക്കി, വയനാട് ജില്ലകളിലെ നിർദ്ദിഷ്ട പരിസ്ഥിതി ലോല മേഖലയിൽ നിന്ന് 31 ഗ്രാമങ്ങളെ പൂർണമായും 92 ഗ്രാമങ്ങളെ ഭാഗികമായും ഒഴിവാക്കണമെന്ന കേരളത്തിന്റെ ശുപാർശ കേന്ദ്ര സർക്കാർ അംഗീകരിച്ചില്ലെന്ന് സിപിഐ എം ആരോപിച്ചു. ഇഎസ്എ സംബന്ധിച്ച അന്തിമ വിജ്ഞാപനം ഉടൻ പുറത്തിറങ്ങുമെന്ന സൂചനകളുടെ പശ്ചാത്തലത്തിലാണ് പാർട്ടിയുടെ പ്രതികരണം.

ഹൈറേഞ്ച് മേഖലയിലെ ജനങ്ങളുടെ ആശങ്കകൾ പരിഹരിക്കുന്നതിനായി വനപ്രദേശങ്ങൾ മാത്രം ഇഎസ്എ അതിർത്തിക്കുള്ളിൽ ഉൾപ്പെടുത്തണമെന്നും ജനവാസ മേഖലകളും കൃഷിയിടങ്ങളും തോട്ടങ്ങളും സംരക്ഷിക്കണമെന്നും മുൻ എൽഡിഎഫ് സർക്കാർ ശുപാർശ ചെയ്തിരുന്നുവെന്ന് സിപിഐ എം വ്യക്തമാക്കി.

ജില്ലാ കളക്ടർമാരുടെ നേതൃത്വത്തിൽ രൂപീകരിച്ച പരിശോധനാ സമിതികളും വനംവകുപ്പ് ഉദ്യോഗസ്ഥരും വിദഗ്ധരും നടത്തിയ പഠനങ്ങളുടെ അടിസ്ഥാനത്തിലായിരുന്നു സംസ്ഥാന സർക്കാർ കേന്ദ്ര വിദഗ്ധ സമിതിക്ക് നിർദ്ദേശങ്ങൾ സമർപ്പിച്ചതെന്ന് പാർട്ടി ചൂണ്ടിക്കാട്ടി. കർഷകരുടെയും മലയോര മേഖലയിലെ ജനങ്ങളുടെയും അഭിപ്രായങ്ങൾ കൂടി പരിഗണിച്ചാണ് ശുപാർശകൾ തയ്യാറാക്കിയതെന്നും പ്രസ്താവനയിൽ പറയുന്നു.

എന്നാൽ ആവശ്യമായ ഫീൽഡ് സർവേകളോ മറ്റ് പരിശോധനകളോ നടത്താതെയാണ് കേന്ദ്ര വിദഗ്ധ സമിതി കേരളത്തിന്റെ നിർദ്ദേശങ്ങൾ തള്ളിക്കളഞ്ഞതെന്ന് സിപിഐ എം ആരോപിച്ചു. വിഷയത്തിൽ സംസ്ഥാന സർക്കാർ ശക്തമായ ഇടപെടൽ നടത്തണമെന്നും കേന്ദ്രത്തിന്റെ നിലപാടിനെതിരെ അടിയന്തര നടപടികൾ സ്വീകരിക്കണമെന്നും പാർട്ടി ആവശ്യപ്പെട്ടു.

കസ്തൂരിരംഗൻ കമ്മിറ്റി റിപ്പോർട്ടുമായി ബന്ധപ്പെട്ട് സംസ്ഥാനങ്ങളുടെ എതിർപ്പുകൾ ഉയർന്നതിനെ തുടർന്നാണ് കേന്ദ്രം പുതിയ വിദഗ്ധ സമിതിയെ നിയോഗിച്ചതെന്നും സിപിഐ എം ചൂണ്ടിക്കാട്ടി. സംസ്ഥാനങ്ങൾ ഉന്നയിച്ച ആശങ്കകൾ പരിഗണിച്ച് സമവായം കണ്ടെത്തുന്നതിനുപകരം കേരളത്തിന്റെ ശുപാർശകൾ നിരസിച്ച് ഏകപക്ഷീയമായ തീരുമാനമാണ് വിദഗ്ധ സമിതി സ്വീകരിച്ചതെന്നാണ് പാർട്ടിയുടെ വിമർശനം.

കേന്ദ്രം നിർദേശിച്ച ഇഎസ്എ മേഖലകളിൽ നിന്ന് ജനവാസ കേന്ദ്രങ്ങൾ, കൃഷിഭൂമികൾ, തോട്ടങ്ങൾ എന്നിവ ഉൾപ്പെടുന്ന 4,548 ചതുരശ്ര കിലോമീറ്റർ ഭൂമി ഒഴിവാക്കണമെന്നാണ് കേരളം ആവശ്യപ്പെട്ടിരുന്നത്. ഇതനുസരിച്ച് ഇടുക്കിയിലെ 28 ഗ്രാമങ്ങൾ ഉൾപ്പെടെ 31 ഗ്രാമങ്ങളെ പൂർണമായും ഇഎസ്എ പരിധിയിൽ നിന്ന് ഒഴിവാക്കാനായിരുന്നു നിർദേശം.

ജനങ്ങളുടെ ഭൂമിയും അവകാശങ്ങളും സംരക്ഷിക്കുന്നതിനൊപ്പം വന-പരിസ്ഥിതി സംരക്ഷണവും ഉറപ്പാക്കുക എന്നതാണ് എൽഡിഎഫ് സർക്കാരിന്റെ നിലപാടെന്ന് സിപിഐ എം വ്യക്തമാക്കി. നിർദ്ദിഷ്ട പ്രദേശങ്ങൾ ഇഎസ്എയായി പ്രഖ്യാപിക്കുകയാണെങ്കിൽ സർക്കാർ ഓഫീസുകൾ, ആശുപത്രികൾ, സ്കൂളുകൾ, വീടുകൾ, ആരാധനാലയങ്ങൾ എന്നിവ ഉൾപ്പെടെ നിരവധി സ്ഥാപനങ്ങൾ പ്രതിസന്ധിയിലാകുമെന്നും പുതിയ നിർമ്മാണങ്ങൾക്കും വികസന പ്രവർത്തനങ്ങൾക്കും നിയന്ത്രണങ്ങൾ നേരിടേണ്ടിവരുമെന്നും പാർട്ടി മുന്നറിയിപ്പ് നൽകി.