ടി.വി.കെ സ്ഥാനാർഥിയുടെ വിജയം റദ്ദാക്കണമെന്ന ആവശ്യം തള്ളി; സ്റ്റാലിന്റെ ഹർജി നിലനിൽക്കില്ലെന്ന് കോടതി

2026-ലെ തമിഴ്നാട് നിയമസഭാ തിരഞ്ഞെടുപ്പിൽ കൊളത്തൂർ മണ്ഡലത്തിലെ ഫലം ചോദ്യം ചെയ്ത് മുൻ മുഖ്യമന്ത്രിയും ഡി.എം.കെ അധ്യക്ഷനുമായ എം.കെ സ്റ്റാലിൻ സമർപ്പിച്ച ഹർജി മദ്രാസ് ഹൈക്കോടതി തള്ളി. ചീഫ് ജസ്റ്റിസ് എസ്.എ. ധർമ്മാധികാരിയും ജസ്റ്റിസ് ജി. അരുൾ മുരുകനും ഉൾപ്പെട്ട ഡിവിഷൻ ബെഞ്ചാണ് ഹർജി നിയമപരമായി നിലനിൽക്കുന്നതല്ലെന്ന് കണ്ടെത്തിയത്.

കൊളത്തൂർ മണ്ഡലത്തിൽ ടി.വി.കെ സ്ഥാനാർഥി വി.എസ്. ബാബുവിനോട് 8,795 വോട്ടുകൾക്കാണ് സ്റ്റാലിൻ പരാജയപ്പെട്ടത്. തിരഞ്ഞെടുപ്പിൽ ഇലക്ട്രോണിക് വോട്ടിംഗ് മെഷീനുകളിലും വി.വി.പാറ്റ് സംവിധാനത്തിലും ക്രമക്കേട് നടന്നതായി ആരോപിച്ച സ്റ്റാലിൻ, മുഴുവൻ വോട്ടുകളും വീണ്ടും എണ്ണണമെന്നും വി.എസ്. ബാബുവിന്റെ വിജയം റദ്ദാക്കി തന്നെ വിജയിയായി പ്രഖ്യാപിക്കണമെന്നുമായിരുന്നു ഹർജിയിൽ ആവശ്യപ്പെട്ടത്.

എന്നാൽ, തിരഞ്ഞെടുപ്പ് ഫലത്തെ ചോദ്യം ചെയ്യുന്ന ഹർജികൾ ഭരണഘടനയുടെ ആർട്ടിക്കിൾ 329(ബി) പ്രകാരം തിരഞ്ഞെടുപ്പ് ഹർജിയായിട്ടു മാത്രമേ സമർപ്പിക്കാനാകൂവെന്ന തിരഞ്ഞെടുപ്പ് കമ്മീഷന്റെ വാദം കോടതി അംഗീകരിച്ചു. വോട്ടെണ്ണലിന് ശേഷം പരിശോധന ആവശ്യപ്പെട്ടിരുന്നെങ്കിലും കമ്മീഷൻ കാലതാമസത്തോടെയാണ് നടപടി സ്വീകരിച്ചതെന്ന സ്റ്റാലിന്റെ വാദവും കോടതി തള്ളി.

കഴിഞ്ഞ മൂന്ന് തിരഞ്ഞെടുപ്പുകളിലും എം.കെ. സ്റ്റാലിൻ വിജയിച്ചിരുന്ന കൊളത്തൂർ മണ്ഡലത്തിൽ, നടൻ വിജയിയുടെ നേതൃത്വത്തിലുള്ള ടി.വി.കെയുടെ ആദ്യ തിരഞ്ഞെടുപ്പ് മത്സരത്തിൽ തന്നെ വി.എസ്. ബാബു വിജയം നേടിയത് തമിഴ്നാട് രാഷ്ട്രീയത്തിൽ വലിയ ചർച്ചയായിരുന്നു. ഹൈക്കോടതിയുടെ പുതിയ വിധി ടി.വി.കെയ്ക്ക് ആശ്വാസവും ഡി.എം.കെയ്ക്ക് മറ്റൊരു തിരിച്ചടിയുമായാണ് വിലയിരുത്തപ്പെടുന്നത്.