ചാനൽ ചർച്ചയ്ക്കിടെ വിദ്വേഷപരമായ പരാമർശങ്ങൾ നടത്തിയെന്ന പരാതിയിൽ മാധ്യമപ്രവർത്തകയും ബിഗ് ടിവി അവതാരകയുമായ അപർണ കുറുപ്പിനെതിരെ കേസ് രജിസ്റ്റർ ചെയ്തു. കാസർകോട് സ്വദേശിയായ അബ്ദുൽ ഹകീം നൽകിയ പരാതിയുടെ അടിസ്ഥാനത്തിലാണ് കൊച്ചി സിറ്റി സൈബർ പൊലീസ് കേസെടുത്തത്.

കാന്തപുരം എ.പി. അബൂബക്കർ മുസ്‌ലിയാർ സ്ത്രീകളെക്കുറിച്ച് നടത്തിയ പരാമർശങ്ങളെ ആസ്പദമാക്കി ബിഗ് ടിവി സംപ്രേഷണം ചെയ്ത 'ബിഗ് ഡയലോഗ്' എന്ന ചർച്ചാ പരിപാടിക്കിടെയുണ്ടായ അവതാരകയുടെ ചില പരാമർശങ്ങളാണ് വിവാദത്തിന് വഴിവെച്ചത്. ചർച്ചയ്ക്കിടെ അപർണ കുറുപ്പ് മുസ്ലിം വിരുദ്ധവും വംശീയവുമായ നിലപാടുകൾ സ്വീകരിച്ചുവെന്നാണ് പരാതിയിലെ ആരോപണം.

പരിപാടിയുടെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ അവതാരകയ്ക്കെതിരെ ശക്തമായ വിമർശനങ്ങളാണ് ഉയർന്നത്. ഇതിന് പിന്നാലെ തനിക്ക് നേരെ വ്യാപകമായ സൈബർ ആക്രമണവും വധഭീഷണിയും ഉണ്ടാകുന്നതായി ചൂണ്ടിക്കാട്ടി അപർണ കുറുപ്പ് പൊലീസിൽ പരാതി നൽകിയിരുന്നു.

വിവാദം ശക്തമായ സാഹചര്യത്തിൽ, തന്റെ പരാമർശങ്ങൾ ആരുടെയെങ്കിലും മതവികാരങ്ങളെ വ്രണപ്പെടുത്തിയിട്ടുണ്ടെങ്കിൽ നിരുപാധികം ഖേദം പ്രകടിപ്പിക്കുന്നതായി അപർണ കുറുപ്പ് പ്രസ്താവന പുറത്തിറക്കി. തുടർന്ന് വിവാദമായ ചർച്ചയുടെ വീഡിയോ ബിഗ് ടിവി സമൂഹമാധ്യമ പ്ലാറ്റ്ഫോമുകളിൽ നിന്ന് പിൻവലിക്കുകയും ചെയ്തു.

എന്നാൽ പരാതിക്കാരന്റെ പരാതിയുടെ അടിസ്ഥാനത്തിൽ ഇപ്പോൾ കേസെടുത്തതോടെ വിഷയത്തിൽ കൂടുതൽ നിയമനടപടികൾ ഉണ്ടാകുമോയെന്നാണ് ശ്രദ്ധിക്കപ്പെടുന്നത്.