മാധ്യമങ്ങള്‍ പ്രചരിപ്പിക്കുന്ന നുണകൾക്കെതിരെ സി.പിഎം ഇന്ന് കണ്ണൂര്‍ ജില്ലയിലെ 6000 കേന്ദ്രങ്ങളിൽ ജനകീയ കൂട്ടായ്മ സംഘടിപ്പിക്കും. വൈകുന്നേരം നാലുമുതൽ ആറുവരെയാണ്പരിപാടി നടക്കുക. സംസ്ഥാനത്തെ മുഖ്യധാരാ മാധ്യമങ്ങൾ ഇടതുപക്ഷത്തെയും രാജ്യത്തിന് തന്നെ മാതൃകയായ കേരള സർക്കാരിനെതിരെയും ഉയർത്തുന്ന നുണകൾ തുറന്നുകാട്ടുന്ന പ്രദർശനവും ഇതിന്റെ ഭാഗമായി ഉണ്ടാകും.

ജില്ലയില്‍ നടത്തുന്ന കൂട്ടായ്മയിൽ മുഴുവനാളുകളും അണിനിരക്കണമെന്ന് ജില്ലാ സെക്രട്ടറി എം വി ജയരാജൻ അഭ്യർത്ഥിച്ചു. സമൂഹത്തില്‍ സ്വതന്ത്രമെന്ന പ്രതീതി സൃഷ്ടിച്ച് കൃത്യമായ അജൻഡകൾക്ക് അനുസൃതമായി പൊതുബോധം നിർമിക്കാനാണ് മാധ്യമ ശ്രമം.ഇടത് മുന്നണി സർക്കാരിന്റെ വികസന - ക്ഷേമ പ്രവർത്തനങ്ങളെ മറയ്ക്കുകയും ഇല്ലാക്കഥകൾ കെട്ടിച്ചമയ്ക്കുകയും ചെയ്യുന്ന മാധ്യമപ്രവർത്തനം അപലപനീയമാണെന്നും ജയരാജൻ പ്രസ്താവനയിൽ പറഞ്ഞു.