മുസ്ലിം ലീഗ്–കോൺഗ്രസ് ബന്ധത്തിൽ വീണ്ടും ആശയകുഴപ്പം രൂക്ഷമാകുന്നു. തർക്കം തുടരുന്ന അമ്പലപ്പുഴ ജില്ലാ പഞ്ചായത്ത് ഡിവിഷനിൽ ഇരുപക്ഷവും ഒടുവിൽ സ്വന്തം സ്ഥാനാർഥികളെ പ്രഖ്യാപിച്ചു, ഇതോടെ മുന്നണി തർക്കം പുറത്തെത്തി .കോൺഗ്രസ് മത്സ്യത്തൊഴിലാളി കോൺഗ്രസ് സംസ്ഥാന ജനറൽ സെക്രട്ടറി എ. ആർ. കണ്ണനെ സ്ഥാനാർഥിയായി ഇറക്കി. പാർട്ടിയിലെ ശക്തമായ ആവശ്യമുണ്ടായിരുന്നിട്ടും, യൂത്ത് കോൺഗ്രസ് ആലപ്പുഴ ജില്ലാ പ്രസിഡന്റ് എം. പി. പ്രവീണിന് സീറ്റ് ലഭിച്ചില്ല.

അതേസമയം, ഇരുപാർട്ടികളുടെയും ചർച്ച പരാജയപ്പെട്ടതോടെ മുസ്ലിം ലീഗും അമ്പലപ്പുഴയിൽ സ്ഥാനാർഥിയെ പ്രഖ്യാപിച്ചു. എംഎസ്എഫ് സംസ്ഥാന വൈസ് പ്രസിഡന്റ് അൽത്താഫ് സുബൈറിനെയാണ് ലീഗ് മത്സരിപ്പിക്കുന്നത്. അൽത്താഫ് സുബൈർ ഇന്ന് തന്നെ നാമനിർദേശം സമർപ്പിക്കുമെന്ന് അറിയിക്കുന്നു. അമ്പലപ്പുഴ സീറ്റ് ലീഗിന് വിട്ടുകൊടുക്കണമെന്ന അവരുടെ ആവശ്യം കോൺഗ്രസ് നിരസിച്ചതിനെത്തുടർന്നായിരുന്നു ലീഗിന്റെ ഈ തീരുമാനമെന്നു അറിയുന്നു.

നാമനിർദേശ സമർപ്പണത്തിന്റെ അവസാന ദിവസത്തിൽ തന്നെ ഇരുപാർട്ടികളും നേർക്കുനേർ എത്തിയിരിക്കെ, കോൺഗ്രസ് നേതാവ് എം. പി. പ്രവീൺ തുറന്ന അസന്തോഷം രേഖപ്പെടുത്തി.
പാർട്ടി എടുത്ത നീതിയില്ലാത്ത തീരുമാനം "പൊലീസിൽ നിന്ന് കിട്ടിയ അടിയേക്കാൾ വേദനിപ്പിക്കുന്നതാണ്" എന്ന് അദ്ദേഹം ഫേസ്ബുക്കിൽ കുറിച്ചു. തന്റെ കുടുംബം കോൺഗ്രസിന് വേണ്ടി മുഴുവൻ ജീവിതവും സമർപ്പിച്ചതായിരുന്നുവെന്നും, ഇപ്പോഴത്തെ അവഗണന തീർത്തും നിസ്സഹായത സൃഷ്ടിച്ചുവെന്നും പ്രവീൺ കുറിപ്പിൽ വ്യക്തമാക്കി. പ്രതിസന്ധികളിലും പോരാട്ടങ്ങളിലും പിന്തുണച്ച എല്ലാവർക്കും നന്ദി രേഖപ്പെടുത്തി.