പശ്ചിമ ബംഗാളിലെ ബങ്കുര ജില്ലയിൽ സിജെപി പ്രവർത്തകന്റെ പിതാവ് ഷെയ്ഖ് മുഹമ്മദ് മാഫിക് കൊല്ലപ്പെട്ട സംഭവത്തിൽ ശക്തമായ പ്രതികരണവുമായി സിപിഐ(എം) ജനറൽ സെക്രട്ടറി എം.എ. ബേബി. സംഭവത്തെ “രാഷ്ട്രീയ അക്രമത്തിന്റെ മരവിപ്പിക്കുന്നതും ക്രൂരവുമായ ഉദാഹരണം” എന്നാണ് അദ്ദേഹം വിശേഷിപ്പിച്ചത്. കുറ്റക്കാർക്കെതിരെ കർശന നടപടി സ്വീകരിച്ച് നിയമത്തിന് മുന്നിൽ കൊണ്ടുവരണമെന്നും അദ്ദേഹം ആവശ്യപ്പെട്ടു.

സോഷ്യൽ മീഡിയ പ്ലാറ്റ്‌ഫോമായ എക്‌സിൽ പങ്കുവെച്ച കുറിപ്പിലാണ് എം.എ. ബേബി പ്രതികരിച്ചത്. ഒരു കുടുംബത്തെ മാത്രം നിശ്ശബ്ദമാക്കുക എന്നതല്ല, വിദ്യാഭ്യാസ സംവിധാനത്തിലെ വീഴ്ചകൾക്കെതിരെ ശബ്ദമുയർത്തുന്ന യുവജനങ്ങളെയും വിദ്യാർഥി പ്രസ്ഥാനങ്ങളെയും ഭയപ്പെടുത്തുകയാണ് ആക്രമണത്തിന്റെ ലക്ഷ്യമെന്ന് അദ്ദേഹം ആരോപിച്ചു.

മാഫിക്കിന്റെ മകൻ ഷെയ്ഖ് അബ്ദുൾ ഹാഫിസ് വിദ്യാർഥി-യുവജന പ്രക്ഷോഭങ്ങളിൽ സജീവമായിരുന്നുവെന്നും, നീറ്റ് പരീക്ഷാ ക്രമക്കേടുകൾക്കെതിരായ സമരങ്ങളിലും ഗ്രാമത്തിലെ സ്കൂളിൽ മെച്ചപ്പെട്ട അടിസ്ഥാന സൗകര്യങ്ങൾ വേണമെന്ന ആവശ്യത്തിലും മുന്നിൽ നിന്നിരുന്നുവെന്നും ബേബി ചൂണ്ടിക്കാട്ടി. ഈ നിലപാടുകളാണ് കുടുംബത്തെ ആക്രമണത്തിന് ഇരയാക്കിയതെന്നാണ് അദ്ദേഹത്തിന്റെ ആരോപണം.

“ന്യായമായ പരീക്ഷകളും ഉത്തരവാദിത്തമുള്ള വിദ്യാഭ്യാസ സ്ഥാപനങ്ങളും ആവശ്യപ്പെടുന്ന വിദ്യാർഥികളെ ആക്രമിക്കരുത്. ജനാധിപത്യ അവകാശങ്ങൾ വിനിയോഗിക്കുന്ന യുവാക്കളുടെ കുടുംബങ്ങൾ ഇത്തരം വില കൊടുക്കേണ്ട സാഹചര്യം ഉണ്ടാകരുത്. അബ്ദുൾ ഹാഫിസിനെപ്പോലുള്ള കൂടുതൽ യുവാക്കളെയാണ് രാജ്യത്തിന് ആവശ്യം,” എന്നും ബേബി പറഞ്ഞു.

സംഭവത്തെ അപലപിച്ച് സിപിഐ(എം) പോളിറ്റ് ബ്യൂറോയും പ്രസ്താവന പുറത്തിറക്കി. ദേശീയ വിദ്യാഭ്യാസ നയത്തിന്റെ പ്രത്യാഘാതങ്ങളും പൊതുവിദ്യാഭ്യാസ മേഖലയിലെ പ്രശ്നങ്ങളും ചൂണ്ടിക്കാട്ടുന്നവരെ ബിജെപിയും അനുബന്ധ സംഘടനകളും ലക്ഷ്യമിടുകയാണെന്നാണ് പാർട്ടിയുടെ ആരോപണം.

ബങ്കുരയിലെ ഒരു സർക്കാർ സ്കൂളിലെ അടിസ്ഥാന സൗകര്യങ്ങളുടെ അഭാവം ചൂണ്ടിക്കാട്ടിയതിന്റെ പേരിലാണ് മാഫിക്കിനെ ലക്ഷ്യമിട്ടതെന്നാണ് സിപിഎമ്മിന്റെ നിലപാട്. കുറ്റവാളികളെ ഉടൻ അറസ്റ്റ് ചെയ്ത് മാതൃകാപരമായ ശിക്ഷ ഉറപ്പാക്കണമെന്ന് പാർട്ടി ആവശ്യപ്പെട്ടു.

അതേസമയം, സർക്കാർ സ്കൂളുകളിലെ അടിസ്ഥാന സൗകര്യങ്ങൾ, ആവശ്യമായ അധ്യാപകർ, സുതാര്യമായ പരീക്ഷാ സംവിധാനം എന്നിവ ഉറപ്പാക്കാൻ കേന്ദ്ര-സംസ്ഥാന സർക്കാരുകൾ അടിയന്തര നടപടി സ്വീകരിക്കണമെന്നും സിപിഐ(എം) ആവശ്യപ്പെട്ടു. വിദ്യാഭ്യാസ മേഖലയെ ശക്തിപ്പെടുത്തുന്നതിലൂടെയാണ് വിദ്യാർഥികളെ ശാക്തീകരിക്കാനാവുകയെന്നും പാർട്ടി വ്യക്തമാക്കി.

റിപ്പോർട്ടുകൾ പ്രകാരം, വിദ്യാലയങ്ങളിലെ അടിസ്ഥാന സൗകര്യക്കുറവ് രേഖപ്പെടുത്തുന്നതിനായി നടത്തിയ സന്ദർശനത്തിന് പിന്നാലെ ഓഗസ്റ്റ് 13-നാണ് ഹാഫിസിന്റെയും പിതാവ് മാഫിക്കിന്റെയും വീട്ടിൽ ആയുധധാരികൾ അതിക്രമിച്ച് കയറി ആക്രമണം നടത്തിയത്. ഗുരുതരമായി പരിക്കേറ്റ മാഫിക് ചികിത്സയിലിരിക്കെ രണ്ട് ദിവസത്തിന് ശേഷം ബർദ്വാൻ മെഡിക്കൽ കോളേജ് ആശുപത്രിയിൽ മരിച്ചു. സംഭവത്തിൽ അന്വേഷണം പുരോഗമിക്കുകയാണ്.