യുഡിഎഫ് ഭരണകാലത്ത് സംസ്ഥാനത്തെ ജനജീവിതം പിന്നോട്ടടിക്കപ്പെട്ടുവെന്ന് എൽഡിഎഫ് കൺവീനർ ടി.പി. രാമകൃഷ്ണൻ ആരോപിച്ചു. എൽഡിഎഫ് യോഗത്തിന് ശേഷം തിരുവനന്തപുരത്ത് മാധ്യമങ്ങളോട് സംസാരിക്കുകയായിരുന്നു അദ്ദേഹം. ജനങ്ങളെ നേരിട്ട് ബാധിക്കുന്ന നിരവധി ഗൗരവ വിഷയങ്ങളാണ് യോഗത്തിൽ ചർച്ച ചെയ്തതെന്നും, യോഗത്തെ ചുറ്റിപ്പറ്റി അനാവശ്യ വിവാദങ്ങൾ സൃഷ്ടിക്കാൻ ചില മാധ്യമങ്ങൾ ശ്രമിച്ചതായും അദ്ദേഹം വിമർശിച്ചു.

മതനിരപേക്ഷതയുടെ കാര്യത്തിൽ കോൺഗ്രസ് നിലപാട് ദുർബലപ്പെടുത്തുകയാണെന്ന് ആരോപിച്ച രാമകൃഷ്ണൻ, വഖഫ് നിയമവുമായി ബന്ധപ്പെട്ട വിഷയങ്ങളിൽ മുസ്ലിം ലീഗിന്റെ പിന്തുണയോടെ കോൺഗ്രസ് സ്വീകരിച്ച നിലപാട് ഇതിന്റെ ഉദാഹരണമാണെന്ന് പറഞ്ഞു. വന്ദേമാതരം പൂർണമായും ആലപിച്ചതിലൂടെ കോൺഗ്രസിന്റെ ‘മൃദു ഹിന്ദുത്വ’ സമീപനം വെളിപ്പെട്ടുവെന്നും, ഇക്കാര്യത്തിൽ പാർട്ടി വ്യക്തമായ നിലപാട് വ്യക്തമാക്കണമെന്നും അദ്ദേഹം ആവശ്യപ്പെട്ടു.

അതേസമയം, ബിജെപിയുമായുള്ള അവിഹിത രാഷ്ട്രീയ ബന്ധം തുടരാനാണ് യുഡിഎഫ് ശ്രമിക്കുന്നതെന്നും ടി.പി. രാമകൃഷ്ണൻ ആരോപിച്ചു. കഴിഞ്ഞ തിരഞ്ഞെടുപ്പിൽ ഏകദേശം 30 മണ്ഡലങ്ങളിൽ ബിജെപി വോട്ടുകളുടെ പിന്തുണയോടെയാണ് യുഡിഎഫ് വിജയിച്ചതെന്നും, ഈ രാഷ്ട്രീയ ബന്ധം ഇപ്പോഴും തുടരുകയാണെന്നും അദ്ദേഹം പറഞ്ഞു.

തൊഴിലുറപ്പ് പദ്ധതിയുമായി ബന്ധപ്പെട്ട് കേന്ദ്രസർക്കാരിനെയും അദ്ദേഹം വിമർശിച്ചു. പദ്ധതിക്കുള്ള കേന്ദ്ര വിഹിതം ആദ്യം വെട്ടിക്കുറച്ചതും പിന്നീട് 60 ശതമാനമായി പരിമിതപ്പെടുത്തിയതും തൊഴിലാളികൾക്ക് തിരിച്ചടിയായെന്നും അദ്ദേഹം ചൂണ്ടിക്കാട്ടി. കേന്ദ്രത്തിന്റെ ഈ നയത്തിനെതിരെ യുഡിഎഫ് സർക്കാർ സ്വീകരിക്കുന്ന നിലപാട് വ്യക്തമാക്കണമെന്നും ടി.പി. രാമകൃഷ്ണൻ ആവശ്യപ്പെട്ടു.