മനുഷ്യത്വം ഉറവപൊട്ടട്ടെ!

സുഗതകുമാരി

ആഘോഷങ്ങള്‍ വേണ്ടെന്നല്ല. പക്ഷെ, അത് സുരക്ഷയെ അവഗണിച്ചുകൊണ്ടാവരുത്. പാവപ്പെട്ട മൃഗങ്ങളുടെ ജീവന്‍ നശിപ്പിച്ച് കൊണ്ടാവരുത്. നമ്മള്‍ ചിരിക്കുമ്പോള്‍ അവ കരയുന്നത് കാണാനുള്ള മനുഷ്യത്വം നമുക്ക് ഉണ്ടാവുമ്പോഴാണ് അവരില്‍ നിന്ന് നാം വ്യത്യസ്തമാവുന്നത്. ആ മനുഷ്യത്വം ഉറവപൊട്ടട്ടെ. .

മനുഷ്യര്‍ക്ക് ഇത് ആനയെഴുന്നള്ളിപ്പ്, ആനയെ മുന്‍നിര്‍ത്തിയുള്ള നെഗളിപ്പ് വേണ്ടെന്ന് വെക്കാന്‍ സാധിക്കില്ലെങ്കില്‍ കുറച്ച് ജാഗ്രത പാലിച്ചുകൂടെ? അവയെ വേദനിപ്പിക്കാതെ, പിണക്കാതെ പരിഗണിച്ചുകൂടെ? വയറ് നിറയെ തീറ്റയും വെള്ളവും കൊടുത്തുകൂടെ? ഉത്സവങ്ങള്‍ക്കും മറ്റ് ആഘോഷങ്ങള്‍ക്കും ആനകളെ ഉപയോഗിക്കുമ്പോള്‍ ഉണ്ടാവുന്ന ദുരന്തങ്ങള്‍ ഏറിവരുമ്പോള്‍ സുരക്ഷിതത്വത്തിന്റെ കാര്യത്തില്‍ അധികൃതര്‍ എന്ത് നടപടികളാണ് എടുക്കുന്നത്? കഴിഞ്ഞ ദിവസം എറണാകുളത്ത് ഇടഞ്ഞ ആന ആക്രമണോത്സുകതയുള്ളതാണെന്നു പറയപ്പെടുന്നതായി വാര്‍ത്തകള്‍ കണ്ടു. കാഴ്ചക്കുറവുള്ള അതിനെ എഴുന്നള്ളിക്കുന്നതിന് വിലക്ക് ഏര്‍പ്പെടുത്തിയിരുന്നതായും ആ വാര്‍ത്തയില്‍ പറയുന്നുണ്ട്. സുരക്ഷിതത്വം, പരിപാലനം എന്നിവ സംബന്ധിച്ചുള്ള നിബന്ധനകള്‍ പാലിക്കാത്തതാണ് പലപ്പോഴും ആന ഇടയാനും ഇടഞ്ഞാല്‍ കൂടുതല്‍ ആളപായവും നാശനഷ്ടവും ഉണ്ടാകാന്‍ കാരണമാവുന്നത്. ഇത് മനസിലാക്കിയിട്ടും വീണ്ടും നിബന്ധനകള്‍ ലംഘിക്കപ്പെടുന്നു!

ആഘോഷ സംഘാടകരും ചില ആന ഉടമകളും പാപ്പാന്മാരും ഇത്തരം കാര്യങ്ങളില്‍ വേണ്ടത്ര ശ്രദ്ധിക്കാറില്ല. കരാറുകാരുടെ അത്യാഗ്രഹമാണ് പലപ്പോഴും കൂടുതല്‍ കുഴപ്പങ്ങള്‍ക്ക് ഇടയാക്കുന്നത്. ആനകളെ വിശ്രമമില്ലാതെ വിവിധ ആരാധനാലയങ്ങളില്‍ എഴുന്നള്ളിക്കുകയാണ്. വിശ്രമമില്ലാതെയുള്ള കഠിനജോലിയും വേണ്ടത്ര ഭക്ഷണമോ വെള്ളമോ കിട്ടാത്ത സ്ഥിതിയും ആനകളെ അസ്വസ്ഥരാക്കും. വേനല്‍ച്ചൂടില്‍ ആനയ്ക്ക് ആശ്വാസം പകരാനുള്ള സംവിധാനങ്ങള്‍ പലേടത്തും ഉണ്ടാകാറില്ല. ഈ സാഹചര്യത്തില്‍, ആനകളുടെയും മനുഷ്യരുടെയും രക്ഷയെ കരുതിയാണ് സര്‍ക്കാറും നീതിപീഠങ്ങളും നിബന്ധനകള്‍ ഏര്‍പ്പെടുത്തിയത്. എന്നാല്‍, അവ പാലിക്കുന്നതിനല്ല, ലംഘിക്കുന്നതിനാണ് ബന്ധപ്പെട്ടവരില്‍ പലരും ഉത്സുകരാവുന്നത്.

വേണ്ടത്ര സ്ഥലസൌകര്യമില്ലാത്തിടത്ത് ജനക്കൂട്ടത്തിന് നടുവിലെന്ന പോലെ ആനകളെ അണിനിരത്തി ആഘോഷങ്ങള്‍ നടത്തുന്നത് കേരളത്തില്‍ പലേടത്തും കാണാം. സുരക്ഷിതത്വം സംബന്ധിച്ചുള്ള പ്രാഥമിക വ്യവസ്ഥകളെങ്കിലും ഇത്തരം സ്ഥലങ്ങളില്‍ പാലിക്കുന്നുണ്ടോ എന്ന് എനിക്കറിഞ്ഞുകൂട. പാപ്പാന്മാരുടെ അശ്രദ്ധയും മദ്യപാനവും കാരണം ആനകളും ആളുകളും അപകടത്തില്‍പ്പെടുന്നതും പതിവാണ്. ഇണക്കം കുറയുന്ന മദക്കാലത്തുപോലും ആനകളെ ആഘോഷങ്ങള്‍ക്ക് കൊണ്ടുപോകുന്നവരുണ്ട്. വിലക്കുള്ള ആനകളെ പേരുമാറ്റി മറ്റു പ്രദേശങ്ങളില്‍ പരിപാടിക്കു കൊണ്ടുപോയി പണം പറ്റുന്ന ചിലരും ഉണ്ടെന്ന് പറഞ്ഞ് കേള്‍ക്കുന്നു. ഇതൊന്നും കാണേണ്ടവര്‍ കാണുന്നില്ല. നടപടികള്‍ എടുക്കുന്നില്ല.

ആഘോഷങ്ങള്‍ വേണ്ടെന്നല്ല. പക്ഷെ, അത് സുരക്ഷയെ അവഗണിച്ചുകൊണ്ടാവരുത്. പാവപ്പെട്ട മൃഗങ്ങളുടെ ജീവന്‍ നശിപ്പിച്ച് കൊണ്ടാവരുത്. നമ്മള്‍ ചിരിക്കുമ്പോള്‍ അവ കരയുന്നത് കാണാനുള്ള മനുഷ്യത്വം നമുക്ക് ഉണ്ടാവുമ്പോഴാണ് അവരില്‍ നിന്ന് നാം വ്യത്യസ്തമാവുന്നത്. ആ മനുഷ്യത്വം ഉറവപൊട്ടട്ടെ.