വളരുന്ന വഴികളെ അറിഞ്ഞ് വളരുക

യു എ ഖാദര്‍

എന്തുവായിക്കണമെന്നും എങ്ങനെ വായിക്കണമെന്നും കൂട്ടുകാര്‍ക്ക് വ്യക്തതയുണ്ടാക്കിക്കൊടുക്കാന്‍ മുതിര്‍ന്നവര്‍ ശ്രദ്ധിക്കണം.

ബാലപ്രസിദ്ധീകരണങ്ങളുടെ നിരവധി കോപ്പികള്‍ കുട്ടികള്‍ക്കിടയില്‍ പ്രചരിക്കുന്നുണ്ടല്ലോ. വായനയില്‍ താല്‍പര്യം മാറിക്കൊണ്ടിരിക്കുന്നുണ്ട്. എന്തു വായിക്കണമെന്നും എങ്ങനെ വായിക്കണമെന്നും കൂട്ടുകാര്‍ക്ക് വ്യക്തതയുണ്ടാക്കിക്കൊടുക്കാന്‍ മുതിര്‍ന്നവര്‍ ശ്രദ്ധിക്കണം. നമ്മുടെ സാഹിത്യകാരന്മാരെക്കുറിച്ചോ അവരുടെ കൃതികളെക്കുറിച്ചോ വേണ്ടത്ര അറിവ് പുതിയ തലമുറയ്ക്കുണ്ടാവുന്നില്ല. വൈക്കം മുഹമ്മദ് ബഷീറിനെ അറിയേണ്ടതുപോലെ കൂട്ടുകാര്‍ അറിഞ്ഞിട്ടുണ്ടോ?

ഭാഷയിലും സാഹിത്യത്തിലുമുണ്ടാകുന്ന പുതുമകളെക്കുറിച്ച് നന്നായി അറിവുണ്ടാകണം. കുഞ്ഞുമനസ്സുകളില്‍ ആത്മവിശ്വാസവും പ്രതികരണശേഷിയും വളര്‍ത്തുകയാണ് പ്രസിദ്ധീകരണങ്ങള്‍ ചെയ്യേണ്ടത്. എന്നാല്‍ ഇപ്പോഴത്തെ പല മാസികകളും അവരുടെ മനസ്സിനെ മലിനമാക്കുകയാണ്. വെറും കച്ചവടമായി മാത്രമാണ് അത്തരക്കാര്‍ പ്രസിദ്ധീകരണങ്ങളെ കാണുന്നത്. അനീതിക്കെതിരെ പൊട്ടിത്തെറിക്കാനുള്ള ആവേശത്തെ തണുപ്പിക്കുകയാണവ ചെയ്യുന്നത്. സ്റണ്ട് സിനിമ കണ്ടുകണ്ട് വലിയ സംഘട്ടനവും കൊലപാതകവുമെല്ലാം നിസ്സാരമാണെന്ന് കരുതാന്‍ നമ്മുടെ മനസ്സ് ശീലിച്ചിരിക്കുന്നു. മുമ്പ് ചൈനയില്‍ ജോലിക്കുപോവുന്ന അമ്മമാര്‍ കുഞ്ഞുങ്ങളെ ഉറക്കാന്‍ അവരുടെ ചുണ്ടുകളില്‍ മയക്കുമരുന്ന് വെച്ചു കൊടുക്കുമായിരുന്നു. കുഞ്ഞ് ഒന്നുമറിയാതെ മയങ്ങിക്കൊള്ളും. ദിവസം കഴിയുന്തോറും മയക്കുമരുന്നിന്റെ അളവുകൂടും. താല്‍ക്കാലികാവശ്യത്തിനായി അമ്മമാര്‍ ചെയ്യുന്ന ഈ കാര്യം കുട്ടിയുടെ കരുത്തും കാന്തിയും കെടുത്തും. ഇതുപോലെ നിലവാരം കുറഞ്ഞ പ്രസിദ്ധീകരണങ്ങളും നമ്മുടെ കുട്ടികളുടെ മാനസികാരോഗ്യത്തെ നശിപ്പിക്കും.