ഇത് ജനങ്ങളുടെ വികസനമല്ല
സുഗതകുമാരി
 |
|
പമ്പാതീരത്ത് വേണ്ടത് വിമാനത്താവളമാണോ? ശുദ്ധവായുവും ജലവും അന്നവുമാണ് ഇവിടെ ഉണ്ടാവേണ്ടത്. നിലനില്‍ക്കേണ്ടത്. ജനങ്ങള്‍ക്ക് വിമാനത്താവളം വേണ്ട എന്ന് പറയുമ്പോള്‍ മറ്റാര്‍ക്കാണ് വിമാനത്താവളം എന്ന് വ്യക്തമാക്കാന്‍ വിമാനത്താവളം നടപ്പിലാക്കാന്‍ വാശിപിടിക്കുന്ന സര്‍ക്കാര്‍ തയ്യാറാവണം. 600 കിലോമീറ്റര്‍ നീളമാണ് നമ്മുടെ കൊച്ചു കേരളത്തിനുള്ളത്. ഇവിടെ ഇപ്പോള്‍ തന്നെ നാല് വിമാനത്താവളങ്ങളുണ്ട്. ഇനിയും വിമാനത്താവളം വേണോ? അതിന് പകരം ഇത്തിരി മനസമാധാനം ഉണ്ടാക്കാന്‍, സന്തോഷത്തോടെ ജീവിക്കാനുള്ള സാഹചര്യമൊരുക്കാന്‍ സര്‍ക്കാര്‍ പ്രവര്‍ത്തനത്തിലേര്‍പ്പെടുകയാണ് വേണ്ടത്. |
പമ്പാതീരത്ത് വേണ്ടത് വിമാനത്താവളമാണോ? ശുദ്ധവായുവും ജലവും അന്നവുമാണ് ഇവിടെ ഉണ്ടാവേണ്ടത്. നിലനില്‍ക്കേണ്ടത്. ജനങ്ങള്‍ക്ക് വിമാനത്താവളം വേണ്ട എന്ന് പറയുമ്പോള്‍ മറ്റാര്‍ക്കാണ് വിമാനത്താവളം എന്ന് വ്യക്തമാക്കാന്‍ വിമാനത്താവളം നടപ്പിലാക്കാന്‍ വാശിപിടിക്കുന്ന സര്‍ക്കാര്‍ തയ്യാറാവണം. 600 കിലോമീറ്റര്‍ നീളമാണ് നമ്മുടെ കൊച്ചു കേരളത്തിനുള്ളത്. ഇവിടെ ഇപ്പോള്‍ തന്നെ നാല് വിമാനത്താവളങ്ങളുണ്ട്. ഇനിയും വിമാനത്താവളം വേണോ? അതിന് പകരം ഇത്തിരി മനസമാധാനം ഉണ്ടാക്കാന്‍, സന്തോഷത്തോടെ ജീവിക്കാനുള്ള സാഹചര്യമൊരുക്കാന്‍ സര്‍ക്കാര്‍ പ്രവര്‍ത്തനത്തിലേര്‍പ്പെടുകയാണ് വേണ്ടത്. നാടാകെ മാലിന്യം പേറുകയാണ്. പുതിയ പുതിയ രോഗങ്ങള്‍ ഭീഷണിയായി വളരുന്നു. കോളറയും മലേറിയയും വാര്‍ത്തയല്ലാതാവുന്നു. രോഗങ്ങള്‍ മൂലമുള്ള മരണം സര്‍വ്വസാധാരണമാവുന്നു. മാലിന്യ നിര്‍മാര്‍ജ്ജനത്തിന് വേണ്ടിയുള്ള മാര്‍ഗങ്ങളെ കുറിച്ച് എന്ത് കൊണ്ട് സര്‍ക്കാര്‍ വിമാനത്താവളത്തിന് വേണ്ടി ചിന്തിക്കുന്നത് പോലെ ചിന്തിക്കുന്നില്ല. കോടാനുകോടി ജീവജാലങ്ങളെ കാക്കുന്ന പ്രകൃതിയാണ് വയല്‍ നികത്തുന്നതോടെ ഇല്ലാതാകുന്നത്. പ്രകൃതിയെ ഭാവി തലമുറയ്ക്ക് കൈമാറാനുള്ള ഉത്തരവാദിത്തം നമ്മളിലാണ് നിക്ഷിപ്തമായിരിക്കുന്നത്. വയല്‍ നികത്തപ്പെടുന്നതോടെ ആവാസവ്യവസ്ഥ കൂടിയാണ് നികത്തപ്പെടുന്നതെന്ന് തിരിച്ചറിയണം.
ഏത് വികസന പദ്ധതിയും ആരംഭിക്കുന്നതിന് മുമ്പ് അത് ആര്‍ക്ക്വേണ്ടിയാണെന്നത് മനസിലുണ്ടാവണമെന്ന് മഹാത്മാഗാന്ധി പറഞ്ഞിട്ടുണ്ട്. പരമദരിദ്രനായ ഗ്രാമീണ കര്‍ഷകന്റെ ദുഖപൂര്‍ണമായ മുഖം മനസിലില്ലാതെ നടത്തുന്ന വികസനങ്ങള്‍ക്ക് ജനമുഖമില്ല. അവ ജനകീയവുമല്ല. ഭൂമാഫിയയുടെ വികസനം ജനങ്ങളുടെ വികസനമല്ല. ആ വികസനത്തില്‍ സന്തോഷിക്കുന്നവരുടെ കൂടെ കേരളത്തിലെ ബഹുഭൂരിപക്ഷം വരുന്ന ജനങ്ങള്‍ ഒരിക്കലുമുണ്ടാവില്ല. കേരളം ഭരിക്കുന്നവര്‍ അത് മറക്കാതിരിക്കുക.