മുഖംമൂടികള്‍
പി വിമല
അഴിഞ്ഞുവീഴും
ചിലരുടെ മുന്നില്‍
അണിഞ്ഞിരുന്ന മുഖംമൂടികള്‍
കടുത്ത ചായക്കൂട്ടുകളാല്‍
പൊലിപ്പിച്ചു കാട്ടിയിരുന്നവ
തുറന്നുപോവും ഉള്ളറകള്‍
മറ്റുചിലരുടെ മുന്നില്‍
അറിയാതെ
രഹസ്യമായി മൂടിവെച്ചിരുന്ന പലതും
പരസ്യമാവുമെന്നോര്‍ക്കാതെ
മിഴിനീരൊഴുക്കി വിങ്ങിപ്പോവും
സ്നേഹം ഭാവിക്കുന്നവരുടെ മുന്നില്‍
ഉള്ളാലവര്‍ ചിരിയൊതുക്കും എന്നറിയാതെ
മടിച്ച് മടിച്ച് പലതും പറഞ്ഞുപോയിട്ടുണ്ട്
ചികഞ്ഞ് ചികഞ്ഞ് ചോദ്യം ചെയ്ത്
എല്ലാം ചോര്‍ത്തുന്നവരുടെ മുന്നില്‍
ഒറ്റിക്കൊടുക്കുമെന്നറിയാതെ പലപ്പോഴും
വരച്ച് കാട്ടാറുണ്ട് ചിത്രങ്ങളാല്‍
ഉള്ളിലെ കനവും കിനാക്കളും
പ്രദര്‍ശനങ്ങള്‍ക്ക് വിധേയമാവുമെന്നറിയാതെ.
ആയുസ്സ് എന്ന ചതുരക്കള്ളി
ത്യാഗരാജന്‍ ചാളക്കടവ്
ആകാശത്തിലേക്കു പിളര്‍ന്ന
ആനവായിലൂടെ,
തെരുവുകളിലിഴഞ്ഞ്
നമ്മുടെയൊന്നും
അനുവാദം പോലും
കാണക്കാക്കാതെ
കണ്ണുകളിലേക്കു വിസര്‍ജിക്കുന്ന
എല്ലാ എപ്പിസോഡുകളും
കഴിഞ്ഞാല്‍,
പടിയിറങ്ങണം;
ഷോ തീരും വരെയല്ലേ
നമുക്ക്
പ്രദര്‍ശനശാലയില്‍
ആയുസ്സുള്ളൂ.
മീനൊളിവില്‍
വിനുജോസഫ്
1.
ഭാരതപ്പുഴ സ്റേഷന്‍
കഴിഞ്ഞതേയുള്ളൂ,
പാളങ്ങളില്‍ താളം
മുറുകുന്നതേയുള്ളൂ.
2.
തീവണ്ടി പുഴയില്‍ വീണ്
എല്ലാവരും മരിച്ചു;
പുള്ളിമീന്‍ ഒളിവിലാണെന്ന്
വാര്‍ത്തയുണ്ട്.